திமுக சார்பில் நடைபெற்ற பயிற்சி மாநாட்டில் மதுபாட்டில்கள் வழங்கப்பட்டதாக பரவும் செய்தி! உண்மை என்ன?

அடேய்.... கொத்தடிமைஸ் என்னடா இதெல்லாம் 

Archived Link

திருப்பத்தூர் மாவட்டம் ஜோலார்பேட்டை அருகே பிப்ரவரி 14 அன்று திமுக வடக்கு மண்டல வாக்குச் சாவடி குழு பயிற்சி மாநாடு நடைபெற்றது. இதில்  முதல்வர் மு.க.ஸ்டாலின் பங்கேற்றார். மாநாட்டில் பங்கேற்க வந்த தொண்டர்களுக்காக அனைவருக்கும் ஒரே மாதிரியான உணவுப் பொருட்கள் அடங்கிய தொகுப்பு பைகள் வழங்கப்பட்டன. 

இந்நிலையில் உணவுப் பொருட்கள் அடங்கிய தொகுப்பு பையில் மதுபானம் இடம்பெற்றிருந்ததாக கூறி புகைப்படம் ஒன்று வைரலாகி வருகிறது. 

உண்மை என்ன, 

பரவி வரும் புகைப்படத்தை கூர்ந்து கவனிக்கையில், மதுபாட்டில் மட்டும் தனியாக தெரிவது போல் இருந்தது.  மேலும் பரப்பப்படும் புகைப்படத்தில் மது பாட்டிலின் நிழல் மட்டும் வலது பக்கமாக விழுந்திருப்பதையும் தெளிவாகக் காண முடிகிறது. இதையடுத்து இந்த புகைப்படம் எடிட் செய்யப்பட்டு பரப்பப்படுகிறதா என்ற சந்தேகம் எழுந்தது. 

அதன் அடிப்படையில் பரவி வரும் புகைப்படத்தை கூகுள் ரிவர்ஸ் இமேஜ் மூலம் தேடினோம். அப்போது DMK Updates என்ற எக்ஸ் பக்கத்தில், ”இன்று நடைபெற இருக்கும் வாக்குச்சாவடி குழுவினருக்கான பயிற்சி மாநாட்டில் தொண்டர்களுக்கு வழங்க உள்ள சிற்றுண்டி தொகுப்பு” என்று குறிப்பிட்டு பரவி வரும் புகைப்படம் இடம்பெற்றிருந்ததை பார்க்கமுடிந்தது. ஆனால் அதில் எங்கும் மதுபாட்டில் இடம்பெறவில்லை.

தொண்டர்களை காக்கும் அரண் திமுக!🖤❤️💪

இன்று நடைபெற இருக்கும் வாக்குச்சாவடி குழுவினருக்கான பயிற்சி மாநாட்டில் தொண்டர்களுக்கு வழங்க உள்ள சிற்றுண்டி தொகுப்பு!#ஸ்டாலின்_தொடரட்டும் pic.twitter.com/xB54Yff4q0

— DMK Updates - தமிழ்நாட்டை தலைகுனிய விடமாட்டேன் (@DMK_Updates) February 11, 2026

மேலும் இது குறித்து ஏதேனும் செய்தி வெளியிடப்பட்டுள்ளதா என்பதை தேடிப் பார்த்த போதும், இப்படியான எந்த தகவலும் செய்திகளில் வெளியாகவில்லை. இதிலிருந்து பரவி வருவது எடிட் செய்யப்பட்ட புகைப்படம் என்பது உறுதியானது. 

முடிவு: 

எனவே, திமுக சார்பில் நடைபெற்ற பயிற்சி மாநாட்டில் தொண்டர்களுக்கு மதுபாட்டில் வழங்கப்பட்டதாகப் பரவும் புகைப்படம் உண்மையானதல்ல. எடிட் செய்யப்பட்டது.