யாருமில்லாத நடுவானில் கை அசைத்த பிரதமர் மோடி எனத் தவறாகப் பரவும் வீடியோ !

வணக்கம் டா மாப்ள.. வானத்துல இருந்து.. ஆமா யாருக்கு டாட்டா காட்டிட்டு இருக்கார்..

Twitter Link | Archive Link

நவம்பர் 25 அன்று இந்திய விமானப்படைக்கு சொந்தமான தேஜஸ் போர் விமானத்தில் பிரதமர் நரேந்திர மோடி பயணம் செய்தார். ஒலியைவிட 1.6 வேகத்தில் பயணிக்கக்கூடிய இந்த விமானம் மணிக்கு 1975 கிமீ வேகத்தில் பயணிக்கக்கூடியது. மேலும் மற்ற போர் விமானங்களை விட இது மிகக் குறைவான எடையைக் கொண்டிருந்தாலும், 13500 கிகி வரையிலான எடைகளைத் தாங்கக் கூடியது போன்ற பல சிறப்புகளைக் கொண்டது இந்த தேஜஸ் போர் விமானம்.

இந்நிலையில், இந்த விமானத்தில் பிரதமர் மோடி பயணம் செய்யும் பொழுது, நடுவானில் இருந்தபடியே அங்கிருந்து கை அசைத்துக் கொண்டே பயணம் செய்வது போன்ற வீடியோ ஒன்று சமூக ஊடகங்களில் வைரலாகப் பரவி வருகிறது. அந்த வீடியோவை சிலர், நடுவானில் யாரும் இல்லாதபொழுதும் கூட மோடி கையசைத்து பயணம் செய்கிறார் பாருங்கள் என்று கூறி நையாண்டியாகப் பதிவு செய்துள்ளதையும் காண முடிகிறது.

தேஜஸ் போர் விமானத்தில் மேகங்களுக்கு மேல் பறந்த போது டாட்டா காட்டிய மோடி..!

ஒருவேளை ஏலியன்களுக்கு டாட்டா காட்டி இருப்பாரோ..? pic.twitter.com/dMTQl7EheD

— ✒️Writer SJB✒️ (@SJB56856832) November 26, 2023

வணக்கம் டா மாப்ள.. வானத்துல இருந்து..🔥

ஆமா யாருக்கு டாட்டா காட்டிட்டு இருக்கான்... 🤣🤣🤣 pic.twitter.com/g2pKyL3w1D

— திராவிட அரக்கன் 🖤❤️🔥 (@NMOHAMMEDISMAIL) November 25, 2023

உண்மை என்ன ?

தேஜஸ் போர் விமானம் பயணம் குறித்து பிரதமர் நரேந்திர மோடி தனது எக்ஸ் பக்கத்தில் கடந்த நவம்பர் 25 அன்று பதிவு செய்து இருக்கிறார். அதில், "தேஜஸில் ஒரு பயணம் வெற்றிகரமாக முடிந்தது. இந்த அனுபவம் நம்பமுடியாத அளவிற்கு என்னை மேம்படுத்தியது. நமது நாட்டின் பூர்வீக திறன்கள் மீதான எனது நம்பிக்கையையும் இது கணிசமாக உயர்த்தியுள்ளது. மேலும் நமது நாட்டின் திறனைப் பற்றிய புதிய பெருமை மற்றும் நம்பிக்கையை எனக்கு அளித்தது." என்று குறிப்பிட்டு பதிவு செய்திருந்தார்.

Successfully completed a sortie on the Tejas. The experience was incredibly enriching, significantly bolstering my confidence in our country's indigenous capabilities, and leaving me with a renewed sense of pride and optimism about our national potential. pic.twitter.com/4aO6Wf9XYO

— Narendra Modi (@narendramodi) November 25, 2023

மேலும் மற்றொரு எக்ஸ் பதிவில் பரவி வரும் வீடியோவின் முழுப் பகுதியையும் குறிப்பிட்டு பதிவு செய்திருந்தையும் காண முடிந்தது.

A flight to remember! Tejas is India’s pride, a manifestation of the strength and skills of 140 crore Indians. pic.twitter.com/n8hZk6fGKc

— Narendra Modi (@narendramodi) November 25, 2023

அந்த வீடியோவில், அவர் தேஜஸ் விமானத்தில் பயணம் செய்து கொண்டிருக்கும் போதே, அவர் பயணம் செய்த விமானத்தைத் தவிர்த்து, மற்றொரு தேஜஸ் போர் விமானமும் வானில் பயணம் செய்வதைக் காண முடிந்தது. எனவே அந்த மற்றொரு போர் விமானத்தை பார்த்தே, இந்த விமானத்தில் இருந்த கேப்டனும், பயணம் செய்த பிரதமர் மோடியும் கை அசைத்துள்ளனர் என்பது உறுதியாகிறது.



 

மேலும் படிக்க: உலகக்கோப்பை இறுதி போட்டிக்கு முன் பிரதமர் மோடி மைதானத்தில் ஊர்வலம் போனதாகப் பரவும் பழைய வீடியோ !

இதற்கு முன்பும் பிரதமர் மோடி குறித்து பல செய்திகள் தவறாகப் பரவின. அது குறித்தும் ஆய்வு செய்து நம் பக்கத்தில் கட்டுரைகளாக வெளியிட்டிருக்கிறோம்.

மேலும் படிக்க: பிரதமர் மோடியின் தாயார் வசித்த வீடு குறித்து தவறாகப் பரப்பப்படும் தகவல் !

முடிவு:

நம் தேடலில், தேஜஸ் போர் விமானத்தில் பயணம் செய்த மோடி, யாருமில்லாத நடுவானில் கை அசைத்து சென்றதாகப் பரவும் செய்திகள் தவறானவை என்பதை அறிய முடிகிறது.