திமுக MLA-களை சண்டைக்கு அழைத்தாரா பவன் கல்யாண்? உண்மை என்ன?

"எத்தனை திமுக எம்எல்ஏ-க்கள் வர்றீங்களோ வாங்க, தோல உரிச்சு தொங்க விட்ருவேன்"

- ஆந்திர துணைமுதல்வர் பவன் கல்யாண் அவர்கள்

X Link / Archive Link

ஆந்திர பிரதேச மாநிலத்தின் துணை முதல்வரும் ஜன சேனா கட்சியின் தலைவருமான பவன் கல்யாண் மேடையில் ஆவேசமாக பேசும் வீடியோ ஒன்றை பதிவிட்டு, ’எத்தனை திமுக எம்எல்ஏ-க்கள் வேண்டுமானல் என்னுடன் மோத வாருங்கள்; தோல உரிச்சு தொங்க விட்ருவேன்’ என்று திமுகவிற்கு எச்சரிக்கை விடுக்கும் வகையில் அவர் பேசியதாக பாஜக ஆதரவாளரால் சமூக வலைத்தளங்களில் பரப்பப்படுகிறது.

"எத்தனை திமுக எம்எல்ஏ-க்கள் வர்றீங்களோ வாங்க, தோல உரிச்சு தொங்க விட்ருவேன்"

- ஆந்திர துணைமுதல்வர் பவன் கல்யாண் அவர்கள்⚡🔥#PawanKalyan pic.twitter.com/2s3sueGsQZ

— MR.Anil (@Saffron_Anil_) October 7, 2025

உண்மை என்ன?

பரப்பப்படும் வீடியோவின் keyframe-களைக் கொண்டு இணையத்தில் தேடுகையில், ‘RTV’ என்ற யூடியூப் தளத்தில் கடந்த 2022ஆம் ஆண்டு அக்டோபர் மாதம் வெளியிடப்பட்டிருந்த வீடியோவைக் காணமுடிந்தது. அதில் பவன் கல்யாண் மூன்று திருமணங்கள் செய்திருப்பது பற்றி எழுந்த விமர்சனம் குறித்து அவர் பேசிருப்பதாக அதன் தலைப்பில் குறிப்பிடப்பட்டுள்ளது. 

மேலும் இது குறித்து தேடியதில், ’Nav Bharat Times’ என்ற செய்தித்தளத்தில் 2022 அக்டோபர் மாதம் இது குறித்து வெளியான செய்தியை ஒன்றைக் காணமுடிந்தது. இதில், தன்னை "package star" என்று விமர்சித்த YSR காங்கிரஸ் கட்சியினரை குறிப்பிட்டு, ’அவ்வாறு தன்னை அழைப்பவர்களை செருப்பால் அடிப்பேன்’ என்று பவன் கல்யாண் பேசியதாக குறிப்பிடப்பட்டுள்ளது. மேலும், ’இதுவரை நீங்கள் என்னுடைய பொறுமையை மட்டுமே பார்த்திருக்கிறீர்கள். கம்பி, ஹாக்கி கட்டை எதை வேண்டுமானால் எடுத்துக்கொண்டு சண்டைக்கு வாருங்கள்’ என்று பேசியதாகவும் தெரிய வருகிறது. 

அதேபோல், ‘The Hindu’ செய்தித்தளத்தில் 2022 அக்டோபர் மாதம் வெளியான செய்தியின் படி, ‘இத்தனை நாள் என்னுடைய பொறுமைதான்  உங்களைக் காப்பாற்றியது. என் ஒரு கையால் உங்களை என்னால் நெரிக்க முடியும். நீங்கள் என்னுடன் மோத விரும்பினாள், கம்பிகளோ, ஹாக்கி கட்டைகளோ அல்லது வெறும் கையிலோ எதுவானாலும் நான் தயாராக இருக்கிறேன். உங்கள் அனைவரின் தோலையும் உரிச்சிருவேன்’ என்று பேசியதாக தெரிய வருகிறது. 

இதிலிருந்து, பரப்பப்படும் வீடியோ கடந்த 2022 அக்டோபர் மாதம் பவன் கல்யாண் YSR காங்கிரஸ் கட்சியிரை குறிப்பிட்டு பேசியது என்பது தெளிவாக தெரியவருகிறது.

முடிவு:

YSR காங்கிரஸ் கட்சியிரை குறிப்பிட்டு பவன் கல்யாண் காட்டமாக பேசிய 3 ஆண்டுகள் பழைய வீடியோவை, திமுக MLA-களை குறிப்பிட்டு சண்டைக்கு அழைக்கும் விதமாக பேசியதாக தவறாக பரப்பி வருகிறார்கள்.