ராகுல்காந்தி முகலாய மன்னரின் வாரிசு எனப் பரப்பப்படும் எடிட் செய்யப்பட்ட புகைப்படம்!

இராகுல் முகலாய மன்னரின் வாரிசு

மக்களவை உறுப்பினர் ராகுல் காந்தி முன்னாள் பிரதமர் மன்மோகன் சிங் உட்பட காங்கிரஸ் தலைவர்கள் இருக்கும் புகைப்படம் ஒன்று வாட்சப்பில் பரப்பப்படுகிறது. காங்கிரஸ் கட்சியின் தலைமை அலுவலகத்தின் எடுக்கப்பட்ட இந்த புகைப்படத்தில் ராகுல் காந்திக்கு பின்னால் முகலாய பேரரசர் பாபரின் படம் உள்ளது என்றும் ராகுல் காந்தி முகலாய வாரிசு என்றும் அப்பதிவில் குறிப்பிடப்பட்டுள்ளது. இதே தகவல் தெலுங்கு மொழியிலும் பேஸ்புக்கில் பரப்பப்படுகிறது.

உண்மை என்ன?

பரவி வரும் புகைப்படம் குறித்து தேடியதில், ’India Today’ இணைய தளத்தில் ’2017, டிசம்பர் 11ம் தேதி வெளியான செய்தி ஒன்றை காண முடிந்தது. இந்திய தேசிய காங்கிரஸ் கட்சியின் தலைவர் பதவிக்கான தேர்தல் 2017ம் ஆண்டு நடைப்பெற்றது. அத்தேர்தலில் போட்டியிடுவதற்காக ராகுல் காந்தி வேட்புமனு தாக்கல் செய்தது பற்றிய செய்தியில் பரவக் கூடிய அதே புகைப்படம் இடம் பெற்றுள்ளது. ஆனால், அதில் ராகுல் காந்திக்கு பின்னால் பாபரின் புகைப்படம் இல்லை. அங்கு காந்தியின் படம் தான் உள்ளது.

மேலும், காங்கிரஸ் கட்சியின் அதிகாரப்பூர்வ எக்ஸ் பக்கத்திலும் இதே புகைப்படம் 2017 டிசம்பர் 4ம் தேதி பதிவிடப்பட்டுள்ளது. அதிலும் காந்தியின் புகைப்படம்தான் உள்ளது.

இவற்றில் இருந்து காங்கிரஸ் கட்சியின் தலைமை அலுவலகத்தில் பாபர் படம் இருப்பதாக பரவக் கூடிய புகைப்படம் போலியாக எடிட் செய்யப்பட்டது என்பதை அறிய முடிகிறது. காந்தியின் படத்தை எடிட் செய்து தவறாக பரப்புகின்றனர்.

முன்னால் பிரதமர் நேரு குடும்பத்தினர் (இந்திரா காந்தி, சோனியா காந்தி, ராகுல் காந்தி) இஸ்லாமிய மற்றும் கிறிஸ்தவ மதத்தை சேர்ந்தவர்கள் என பல பொய் செய்திகள் இதற்கு முன்னர் பரப்பப்பட்டுள்ளது. அவை பற்றிய உண்மைகளும் யூடர்னில் கட்டுரையாக வெளியிடப்பட்டுள்ளது.

மேலும் படிக்க: 'கல்வியால் நான் ஆங்கிலேயன், கலாச்சாரத்தால் ஒரு முஸ்லீம், துரதிஷ்டவசமாக பிறப்பால் நான் ஒரு இந்து' என்று கூறினாரா நேரு?

மேலும் படிக்க: காங்கிரஸ் ஒரு முஸ்லீம் கட்சி என ராகுல் காந்தி அறிவித்ததாகப் பரப்பப்படும் பொய் செய்தி!

முடிவு :

ராகுல் காந்திக்கு பின்னால் பாபரின் படம் இருப்பதாகப் பரவக் கூடிய புகைப்படம் போலியாக எடிட் செய்யப்பட்டது. அந்த இடத்தில் காந்தியின் புகைப்படம் தான் உள்ளது.