யூடர்ன் தீர்ப்பு
YouTurn Verdict
சரிபார்க்கப்பட்ட கூற்று
சமாஜ்வாடி கட்சியை சேர்ந்த நாடாளுமன்ற உறுப்பினர் அவதேஷ் பிரசாத் பத்திரிகையாளர் சந்திப்பில் அழுதபோது எடுக்கப்பட்ட வீடியோ இது.
பரவிய செய்தி
பீகாரில் மூத்த.. வயதான காங்கிரஸ் பொறுப்பாளரின் கதறல்
விரிவான விளக்கம்
சமீபத்தில் நடந்து முடிந்த பீகார் மாநிலத்தின் சட்டமன்ற தேர்தலில், பாஜக, நிதீஷ் குமாரின் ஐக்கிய ஜனதா தளம் ஆகிய கட்சிகள் இடம்பெற்றிருந்த தேசிய ஜனநாயகக் கூட்டணி (NDA) 200 தொகுதிக்கு மேல் வெற்றி பெற்றது.
இந்நிலையில், வயதான மூத்த அரசியல் தலைவர் ஒருவர் பத்திரிகையாளர் சந்திப்பில் தேம்பி அழும் வீடியோ ஒன்றை சமூக வலைத்தளங்களில் பதிவிட்டு, ’பீகார் தேர்தலில் காங்கிரஸ் கட்சி மிக மோசமாக தோல்வியடைந்ததால் அதன் மாநில பொறுப்பாளர் பத்திரிகையாளர் சந்திப்பிலே கதறி அழுவதாக’ பரப்பப்படுகிறது.
பீகாரில் மூத்த.. வயதான காங்கிரஸ் பொறுப்பாளரின் கதறல்...😭😭😁😁
அந்தப் பப்பு பயலை நம்பி வந்ததுக்கு... கட்சியை காலி பண்ணி... நம்மள தெருவுல விட்டுட்டு.. வெளிநாட்டுக்கு ஓடிட்டான்...
அவன் தங்கச்சியும் வெளிநாட்டுக்கு ஓடிட்டா...
நாமதான் நடுத்தெருவுல நிக்கிறோம்... pic.twitter.com/xwZ2cGWfOp
உண்மை என்ன?
பரப்பப்படும் வீடியோவின் keyframe-களைக் கொண்டு இணையத்தில் தேடுகையில், ’India Today’ ஊடகத்தின் இன்ஸ்டாகிராம் பக்கத்தில் இந்த வீடியோவைக் காணமுடிந்தது.
அந்த செய்தியில், ‘அயோத்தியில் 22 வயது தலித் பெண் ஒருவர் பாலியல் வன்கொடுமை செய்யப்பட்டு கொலை செய்யப்பட்ட வழக்கில் அப்பெண்ணின் குடும்பத்திற்கு நீதி கிடைக்கவில்லை என்றால் நான் பதவியை ராஜினாமா செய்வேன் என்று கூறி பத்திரிகையாளர் சந்திப்பிலே சமாஜ்வாடி கட்சியின் எம்பி அவதேஷ் பிரசாத் அழுததாக’ குறிப்பிடப்பட்டுள்ளது.
இதனை அடிப்படையாகக் கொண்டு மேலும் தேடியதில், ’BBC தமிழ்’ செய்தித்தளத்தில் ஒரு செய்தியைக் காணமுடிந்தது. பிப்ரவரி 4, 2025 அன்று வெளியான இந்த செய்தியிலும் மேற்குறிப்பிட்ட அதே தகவல்கள் தான் குறிப்பிடப்பட்டுள்ளது.
இதிலிருந்து, பரப்பப்படும் இந்த வீடியோ 8 மாதங்களுக்கு முன்பு எடுக்கப்பட்டது என்பதும், பத்திரிகையாளர் சந்திப்பில் அழுவது காங்கிரஸ் கட்சியைச் சேர்ந்தவர் அல்ல, உத்தர பிரதேசத்தின் சமாஜ்வாடி கட்சியை சேர்ந்த நாடாளுமன்ற உறுப்பினர் என்பதும் தெரியவருகிறது.
முடிவு:
8 மாதங்களுக்கு முன்பு பத்திரிகையாளர் சந்திப்பில் சமாஜ்வாடி கட்சியின் நாடாளுமன்ற உறுப்பினர் அழுத பழைய வீடியோவை, பீகார் தேர்தலுடன் தொடர்புபடுத்தி காங்கிரஸ் கட்சி பொறுப்பாளர் அழுததாக தவறான தகவலை பரப்புகிறார்கள்.
