இந்தியாவில் ஒரு நாடாளுமன்றத் தொகுதிக்கு 25 லட்சம் வாக்காளர்கள் இருக்கிறார்களா? அண்ணாமலை சொல்லும் தவறான தகவல்!

‘இன்றைய காலத்தில் ஒரு நாடாளுமன்றத் தொகுதிக்கு 25 லட்சம் வாக்காளர்கள் இருக்கிறார்கள்’ - அண்ணாமலை.

YouTube Link

கிருஷ்ணகிரி மாவட்டத்தில் உள்ள தளி சட்டமன்றத் தொகுதியில் தேர்தல் பிரச்சாரத்தில் பேசிய பாஜகவைச் சேர்ந்த அண்ணாமலை, ‘இன்றைய காலத்தில் ஒரு நாடாளுமன்றத் தொகுதிக்கு 25 லட்சம் வாக்காளர்கள் இருக்கிறார்கள். இதனால் நாடாளுமன்ற உறுப்பினர்களால் மக்களை சந்திக்க முடிவதில்லை. மோடி கொண்டு வந்த தொகுதி மறுவரையறையின் படி நாடாளுமன்றத் தொகுதிகளை 543-லிருந்து 816-ஆக உயர்த்தியிருந்தால், 12 லட்சம் பேருக்கு ஒரு நாடாளுமன்ற உறுப்பினர் (MP) என்ற நிலை ஏற்பட்டிருக்கும்’ என்று பேசினார்.

உண்மை என்ன?

இந்தியாவில் ஒரு நாடாளுமன்றத் தொகுதிக்கு சராசரியாக எத்தனை வாக்காளர்கள் இருக்கிறார்கள் என்பது குறித்து இணையத்தில் தேடினோம். ’The Indian EXPRESS’ செய்தித்தளத்தில் ஒரு செய்தியைக் காணமுடிந்தது. 

2025 மார்ச் மாதம் வெளியாகியிருந்த அந்த செய்தியில், ’2024ஆம் ஆண்டில் இந்தியாவில் ஒரு நாடாளுமன்றத் தொகுதிக்கு சராசரியாக 17.84 லட்சம் வாக்காளர்கள் இருந்ததாக’ தேர்தல் ஆணையம்’ தெரிவித்துள்ளது. 

அதேபோல் கடைசியாக 1973-ல் தொகுதி மறுவரையறை செய்யப்பட்டதற்கு பின்னர் முதல் நாடாளுமன்றத் தேர்தல் 1977-ல் நடந்தது. அப்போது ஒரு நாடாளுமன்றத் தொகுதிக்கு சராசரியாக 5.93 லட்சம்  வாக்காளர்கள் இருந்தார்கள். 

அதேபோல், ’Down To Earth’ கட்டுரையின் ஒன்றின்படி, 1951-ல் நாடாளுமன்றத் தொகுதிக்கு சராசரியாக 3.54 லட்சம் வாக்காளர்கள் இருந்ததாகவும், 2014ஆம் ஆண்டில் நாடாளுமன்றத் தொகுதிக்கு சராசரியாக 15 லட்சம் வாக்காளர்கள் இருந்ததாகவும் தெரியவருகிறது.

மேற்கூறிய விவரங்களிலிருந்து, 1951ஆம் ஆண்டிலிருந்து நாடாளுமன்றத் தொகுதியின் சராசரியான வாக்காளர் எண்ணிக்கை அதிகரித்து வந்துள்ளது. ஆனால், கடைசியாக நடந்த 2024 நாடாளுமன்றத் தேர்தலில், நாடாளுமன்றத் தொகுதிக்கு சராசரியாக 17.84 லட்சம் வாக்காளர்கள் தான் இருந்துள்ளனர்.

முடிவு:

தற்போது நாடாளுமன்றத் தொகுதியில் சராசரியாக 17.84 லட்சம் வாக்காளர்கள் தான் இருக்கிறார்கள். இதனை மிகைப்படுத்தி தொகுதிக்கு 25 லட்சம் வாக்காளர்கள் இருப்பதாக அண்ணாமலை தவறான தகவலை பரப்புகிறார்.