யூடர்ன் தீர்ப்பு
YouTurn Verdict
சரிபார்க்கப்பட்ட கூற்று
உத்தரகாண்ட் மாநிலத்தில் உள்ள சாம்பூர் என்ற பகுதியில், பெண் ஒருவர் மதுபோதையில் சாலையில் விழுந்து கிடந்தபோது எடுக்கப்பட்ட வீடியோவாகும். இதை தமிழ்நாடு என்று கூறி பலரும் தவறாகப் பரப்பி வருகின்றனர்.
பரவிய செய்தி
"திமுக விற்கிற சாராயத்தை குடித்த தமிழக பெண்களின் அவலநிலையை பாரீர். திகார் ராணி கனிமொழியே, உன் அண்ணன் ச்டாலின் ஆட்சியில் திமுக குடும்பங்கள் தயாரித்து விற்கும் சாராயத்தை குடித்து விட்டு அவமானம் பட்டு கிடக்கும் இந்த பெண்கள் உன் கண்ணுக்கு தெரியலையா? கண் இருந்தும் குருடாகலாமா?"
விரிவான விளக்கம்
மது போதையில் இருக்கும் தமிழ்நாட்டுப் பெண் எனக்கூறி வீடியோ ஒன்று சமூக வலைதளங்களில் வைரலாகி வருகிறது. வீடியோவில் ஒரு பெண் சாலையோரம் திடீரென கீழே விழுவதும், அருகில் இருந்தவர்கள் அவரை தூக்கி விட செல்லும் காட்சிகளும் இடம்பெற்றுள்ளன. மேலும் அந்த பதிவில் திமுக விற்கும் சாராயத்தை குடித்த தமிழக பெண்களின் அவலநிலையை பாருங்கள் என்று கூறப்பட்டுள்ளது.
உண்மை என்ன?
பரவி வரும் வீடியோவை கூகுள் ரிவர்ஸ் இமேஜ் மூலம் தேடி பார்த்தோம். அப்போது karan_moto_vlogger08 என்ற யூடியூப் பக்கத்திற்கு அழைத்து சென்றது. அதில் 21 ஜூன், 2025 அன்று "Girl accident" என்ற தலைப்பில் பரவி வரும் வீடியோ பதிவாகியிருந்ததை காணமுடிந்தது.
அந்த வீடியோவில் ஹிந்தியில் பேசுவதை பார்க்கமுடிந்தது. அதை மொழிபெயர்ப்பு செய்து கேட்டப்போது, “அந்த வீடியோ எடுக்கும் நபர் காவல்துறைக்கு முதலில் தகவல் அளிக்கிறார். பின்பு அருகில் இருந்த கடைக்காரரிடம் இது எந்த இடம் என்று கேட்டபோது, இது சாம்பூர் என்று கூறுவதையும் கேட்கமுடிந்தது.”
இதையடுத்து அந்த யூடியூப் சேனலை ஆய்வு செய்து பார்த்தபோது, பைக்கில் டூர் செல்லும் பல்வேறு வீடியோக்கள் இடம்பெற்றிருந்ததை காணமுந்தது. மேலும் அந்த யூடியூப் பக்கத்தில், ஒரு இன்ஸாகிராம் பக்கத்தின் லிங் ஒன்றும் இடம்பெற்றிருந்தது. அதை கிளிக் செய்து பார்த்தப்போது, karan_moto_vlogger08 என்ற இன்ஸ்டாகிராம் பக்கத்திற்கு அழைத்து சென்றது. அதில் உள்ள bioவில் தன் பெயர் கரண் என்றும், தான் அரித்துவாரை சேர்ந்தவர் எனவும் குறிப்பிட்டுருந்தது.
அந்த இன்ஸ்டாகிராம் பக்கத்தில் ஜூன் 19 அன்று, "Over drink" என்ற தலைப்பில் பரவி வரும் வீடியோ பதிவாகியிருந்ததை பார்க்கமுடிந்தது. எனவே இந்த வீடியோ உத்தரகாண்ட் மாநிலத்தில் உள்ள சாம்பூர் என்ற பகுதியில் எடுக்கப்பட்டது உறுதியானது.
முடிவு:
நம் ஆய்வில், உத்தரகாண்ட் மாநிலத்தில் உள்ள சாம்பூர் என்ற பகுதியில், பெண் ஒருவர் மதுபோதையில் சாலையில் விழுந்து கிடந்தபோது எடுக்கப்பட்ட வீடியோவாகும். இதை தமிழ்நாடு என்று கூறி பலரும் தவறாகப் பரப்பி வருகின்றனர்.
