திமுக தொடர்ந்து இரண்டு முறை ஆட்சியமைத்ததில்லையா? விஜய் சொல்லும் தவறான தகவல்!

"தமிழ்நாடு சட்டமன்றத் தேர்தல் வரலாற்றில் திமுக தொடர்ந்து இரண்டு முறை வெற்றிபெற்று ஆட்சியமைத்ததில்லை" - தவெக தலைவர் விஜய்.

Link

தஞ்சாவூரில் மக்கள் சந்திப்புக் கூட்டத்தில் பேசிய தவெக தலைவர் விஜய், ”அடுத்தமுறையும் (2026 சட்டமன்றத் தேர்தலில்) திமுக தான் வெற்றி பெற்று ஆட்சியமைக்கும் என்று முதல்வர் ஸ்டாலின் சொல்லிவருகிறார். வரலாற்றில் தொடர்ந்து இரண்டாவது முறை சட்டமன்றத் தேர்தலில் வெற்றிபெற்று திமுக ஆட்சியமைத்ததில்லை. கலைஞர் கருணாநிதி திமுக தலைவராக இருந்தபோது கூட இவ்வாறு தொடர்ந்து இரண்டாம் முறையாக திமுகவால் ஆட்சியமைக்க முடியவில்லை” என்று தவெக தலைவர் விஜய் கூறினார்.

உண்மை என்ன?

தமிழ்நாடு சட்டமன்ற வரலாற்றில் திமுகவின் ஆட்சிக்காலம் குறித்து தேடினோம். ’தமிழ்நாடு சட்டமன்றப் பேரவை’-யின் அதிகாரப்பூர்வ இணையதளத்தில் முதலமைச்சர்களின் ஆட்சிக்காலம் குறித்த தகவல்களைக் காணமுடிந்தது.

அதன்படி, 1967 சட்டமன்றத் தேர்தலில் வெற்றி பெற்று அண்ணாதுரை முதல்வரானார். ஆனால், 1969ஆம் ஆண்டில் அவர் புற்றுநோய் காரணமாக அவர் இறந்துவிடவே, கலைஞர் கருணாநிதி முதல்வராக பொறுப்பேற்றார். அவர் 1969 பிப்ரவரி முதல் 1971 ஜனவரி வரை முதல்வராக இருந்தார். 

அதன் பின்னர், 1971 சட்டமன்றத் தேர்தலில் வெற்றிபெற்று திமுக மீண்டும் ஆட்சியமைத்தது. 1971 மார்ச் முதல் 1976 ஜனவரி வரை கலைஞர் முதல்வராக இருந்தார்.

இதிலிருந்து, 1967 மற்றும் 1971 ஆகிய இரண்டு சட்டமன்றத் தேர்தலில் திமுக தொடர்ந்து வெற்றி பெற்று ஆட்சியமைத்திருக்கிறது என்பதை அறிய முடிகிறது.

முடிவு:

தமிழ்நாடு சட்டமன்றத் தேர்தல் வரலாற்றில் திமுக தொடர்ந்து இரண்டு முறை வெற்றிபெற்று ஆட்சியமைத்ததில்லை என்று தவெக தலைவர் விஜய் தவறான தகவலை பேசியுள்ளார்.