யூடர்ன் தீர்ப்பு
YouTurn Verdict
சரிபார்க்கப்பட்ட கூற்று
பரவி வருவது 'VKT Transports' என்ற சுற்றுலா பேருந்து நிறுவனம் வெளியிட்ட வீடியோவாகும். இதனை கரூர் கூட்ட நெரிசலில் உயிரிழந்தவர்களின் உறவினர்கள் விஜயை சந்திக்க மகாபலிபுரம் செல்லும் வழியில் நடனமாடியதாக தவறாக பரப்புகின்றனர்.
பரவிய செய்தி
வீட்டுல இருக்குற சின்ன குழந்தைங்க, அம்மா, அப்பா அண்ணன்,தம்பி, தங்கச்சி செத்து ஒரு மாசம்கூட ஆகல இவனுக குத்தாட்டம் போட்டு போயி விஜய பாக்க போறானுக
என்ன ஜென்மம்டா நீங்கலாம்
விரிவான விளக்கம்
கரூர் வேலுச்சாமிபுரத்தில் செப்டம்பர் 27ஆம் தேதி, தவெக தலைவர் விஜய்யின் பரப்புரைக் கூட்டத்தில் ஏற்பட்ட கூட்ட நெரிசலில் சிக்கி 41 பேர் உயிரிழந்தனர். இதையடுத்து பாதிக்கப்பட்ட குடும்பத்தினரை நேரில் சந்திக்க அனுமதி கிடைப்பதில் சிக்கல் ஏற்பட்டது. இதன் காரணமாக உயிரிழந்த 41 பேரின் குடும்பத்தினரையும் சென்னைக்கு வரவழைத்து நேரில் சந்திக்க விஜய் முடிவு செய்து, அவர்களை தனியார் ஆம்னி பேருந்து மூலம் சென்னை மாமல்லபுரத்தில் உள்ள பார் பாயிண்ட்ஸ் ஓட்டலில் வரவழைத்து சந்தித்து பேசினார்.
இந்நிலையில் உயிரிழந்தவர்களின் உறவினர்கள் விஜயை சந்திக்கும் ஆர்வத்தில் பேருந்தில் இருந்து இறங்கி நடனமாடியதாக வீடியோ ஒன்று வைரலாகி வருகிறது.
வீட்டுல இருக்குற சின்ன குழந்தைங்க, அம்மா, அப்பா அண்ணன்,தம்பி, தங்கச்சி செத்து ஒரு மாசம்கூட ஆகல இவனுக குத்தாட்டம் போட்டு போயி விஜய பாக்க போறானுக 😳
என்ன ஜென்மம்டா நீங்கலாம் 💦💦💦 pic.twitter.com/YEvtTIIa3Q
உண்மை என்ன?
பரவி வரும் வீடியோவில் உள்ள பேருந்தில் VKT என்றிருந்ததை பார்க்கமுடிந்தது. இதையடுத்து உயிரிழந்தவர்களின் உறவினர்கள் சென்னைக்கு புறப்பட்ட செய்தி ஏதேனும் வெளியாகியுள்ளதா என்பதை தேடினோம். அப்போது Gallatta ஊடகத்தில் ”கரூர் சம்பவபத்தில் பாதிக்கப்பட்ட குடும்பத்தினர்களை சந்திக்க பேருந்து மூலம் அழைத்து வரும் Vijay ” என்று குறிப்பிட்டு பேருந்துகள் நிற்கும் வீடியோ வெளியாகியாகிருந்தது. அதில் பேருந்துகளில் YBM Travels என்று குறிப்பிட்டிருந்ததை பார்க்கமுடிந்தது.
அதே போல் சமயம் ஊடகத்திலும், ”விஜய்யை சந்திக்க சென்னை புறப்பட்ட மக்கள் ..திடீரென தவெகவினர் செய்த பூஜை -கரூரில் பரபரப்பு!” என்ற தலைப்பில் செய்தி வெளியாகியிருந்தது. அந்த செய்தியில் இருக்கும் புகைப்படத்திலும் YBM Travels என்று குறிப்பிட்ட பேருந்தே இடம்பெற்றிருந்தது.
இதையடுத்து பரவி வரும் வீடியோவை கூகுள் ரிவர்ஸ் இமேஜ் மூலம் தேடிப் பார்த்தோம். அப்போது அக்டோபர் 24 அன்று, ditoholidays and vkt_transports ஆகிய இன்ஸ்டாகிராம் பக்கங்களில் இந்த வீடியோ பதிவாகியிருந்ததை பார்க்கமுடிந்தது. இதன் மூலம் பரவி வருவது இது 'VKT Transports' என்ற சுற்றுலா பேருந்து நிறுவனம் வெளியிட்ட வீடியோ என்பது தெரியவந்தது.
முடிவு:
எனவே, நம் தேடலில் பரவி வருவது 'VKT Transports' என்ற சுற்றுலா பேருந்து நிறுவனம் வெளியிட்ட வீடியோவாகும். இதனை கரூர் கூட்ட நெரிசலில் உயிரிழந்தவர்களின் உறவினர்கள் விஜயை சந்திக்க மகாபலிபுரம் செல்லும் வழியில் நடனமாடியதாக தவறாகப் பரப்புகின்றனர்.
