யூடர்ன் தீர்ப்பு
YouTurn Verdict
சரிபார்க்கப்பட்ட கூற்று
வங்கதேசத்தில் கடையில் பணத்தை திருட முயன்ற பெண்ணை கடை உரிமையாளர் அடிக்கும் போது எடுக்கப்பட்ட வீடியோ இது.
பரவிய செய்தி
RSS தீவிரவாதிகள் ஒரு இளம் முஸ்லிம் சிறுமியைத் தாக்கி, 'ஜெய் சிரி ராம்' என்று கோஷமிட வற்புறுத்தி தாக்கப்படுகிறார்.
விரிவான விளக்கம்
சூப்பர் மார்க்கெட் போன்ற கடையில் பர்தா அணிந்திருக்கும் ஒரு பெண்ணை ஆண் ஒருவர் திரும்பத் திரும்ப அடிக்கும் வீடியோவை பதிவிட்டு, RSS-ஐ சேர்ந்த குண்டர் ஒருவர் முஸ்லிம் பெண் ஒருவரை ’ஜெய் ஸ்ரீராம்’ என்று முழக்கமிடச் சொல்லி தாக்கியதாக சமூக வலைத்தளத்தில் பரப்புகிறார்கள்.
உண்மை என்ன?
பரப்பப்படும் இந்த வீடியோவின் keyframe-களைக் கொண்டு தேடுகையில், ‘Sylhetor News’ என்ற பேஸ்புக் பக்கத்தில் இந்த வீடியோ இருப்பதைக் காணமுடிந்தது.
அந்த வீடியோவில், ‘மிர்பூர் கல்லூரி மார்க்கெட்-ல் இளம் பெண் ஒருவர் கடையில் பணத்தை திருடும் போது பிடிபட்டார்’ என்று பங்களா மொழியில் எழுதப்பட்டுள்ளது. மேலும் அந்தப் பெண்ணின் பெயர் அனிகா என்றும் அவர் வசிப்பூரை சேர்ந்தவர் என்றும் அதில் குறிப்பிடப்பட்டுள்ளது. இதிலிருந்து, இந்த சம்பவம் இந்தியாவில் நடக்கவில்லை, வங்கதேசத்தில் நடந்துள்ளது என்பதை அறியமுடிகிறது.
மேலும் இந்த வீடியோவில், அந்த பெண் கடையின் பணப்பெட்டியில் இருந்து பணத்தை திருட முயற்சிக்கும் CCTV காட்சியை அந்த ஆண் தனது மொபைல்போனில் காட்டுவதை பார்க்கிறோம். அந்த CCTV காட்சியில் ’sohanaS Pet Shop’ என்று எழுதப்பட்டிருப்பதைக் காண்கிறோம்.
இதனைக் கொண்டு ’sohanaS Pet Shop - Mirpur college market’ என்று Google Map-ல் தேடிய போது, வங்கதேசத்தின் மிர்பூரில் உள்ள ஹஸ்ரத் ஷா அலி கல்லூரி மார்க்கெட்-ல் இந்த கடை இருப்பதைக் காணமுடிகிறது. அதோடு அந்த வீடியோவில் எங்கும் ’ஜெய் ஸ்ரீராம்’ என்று குறிப்பிடப்படவில்லை என்பதையும் கவனிக்கிறோம்.
அதேபோல், ‘Bd Tube Master News’ என்ற பேஸ்புக் பக்கத்திலும் அந்த பெண் கடையில் திருட முயன்ற போது பிடிபட்டதாக குறிப்பிடப்பட்டுள்ளது. இந்த வீடியோவில் இந்த சம்பவம் 2025 செப்டம்பர் 17ஆம் தேதி நடந்ததாக குறிப்பிடப்பட்டுள்ளது.
மேற்கூறிய விவரங்களிலிருந்து, இந்த சம்பவம் வங்கதேசத்தில் கடையில் பணத்தை திருட முயன்ற பெண்ணை கடை உரிமையாளர் அடிக்கும் போது எடுக்கப்பட்டது என்பதும் இந்த சம்பவம் 2025 செப்டம்பர் மாதம் நடந்தது என்பதும் தெளிவாகத் தெரிகிறது. மேலும் இந்த சம்பவத்தில் எங்கும் மதவாத கோஷம் எழுப்பப்படவில்லை.
முடிவு:
வங்கதேசத்தில் கடையில் பணத்தை திருட முயன்ற பெண்ணை கடை உரிமையாளர் அடிக்கும் போது எடுக்கப்பட்ட வீடியோவை, இந்தியாவில் ஆர்.எஸ்.எஸ்-காரர்கள் முஸ்லிம் பெண்ணை ’ஜெய் ஸ்ரீராம்’ என்று முழக்கமிடச் சொல்லி தாக்கியதாக தவறாக பரப்புகிறார்கள்.
