ராம்நாத் கோவிந்தின் மகள் என்று பரப்பப்படும் புகைப்படம்! உண்மை என்ன?

இந்த புகைப்படத்தில் சிவப்பு நிற உடையில் இருக்கும் பெண் முன்னாள் ஜனாதிபதி ராம்நாத் கோவிந்த் ஜியின் மகள், ஸ்வாதி கோவிந்த். இவர் ஏர் இந்தியா நிறுவனத்தில் விமானப் பணிப்பெண்ணாக பணியாற்றிவர்.

Link / Archive Link  

ஒரு விமானம் பின்புலத்தில் நின்றுகொண்டிருக்க, விமானப் பணிப்பெண்கள் இரண்டு பேர் வணக்கம் தெரிவிப்பது போன்றதொரு புகைப்படம். அதில் சிவப்பு நிற உடை அணிந்திருக்கும் பெண், முன்னாள் ஜனாதிபதி ராம்நாத் கோவிந்த் ஜியினின் மகள் ஸ்வாதி கோவிந்த் என்றும் அவர் இரண்டு மாதங்களுக்கு முன்பு வரை ஏர் இந்தியாவின் போயிங் 777 மற்றும் 787 விமானங்களில் பணிப்பெண்ணாக பணியாற்றியவர் என்றும் பாஜக ஆதரவாளரால் சமூக வலைத்தளத்தில் பரப்பப்படுகிறது. 

BJP யின் உண்மை முகம் தெரிந்தது!!! உங்களில் எத்தனை பேருக்கு இந்த சிவப்பு டி-சர்ட் அணிந்த பெண்ணை தெரியும் அல்லது அடையாளம் தெரியும்? அவள் பெயர் ஸ்வாதி. இரண்டு மாதங்களுக்கு முன்பு வரை ஏர் இந்தியா விமானத்தில் ஆஸ்திரேலியா சென்றவர்களுக்கு அவளை அடையாளம் தெரியும். அவள் ஏர் இந்தியாவின்… pic.twitter.com/kfvvUEoiSp

— Dr Mouth Matters (@GanKanchi) August 7, 2025

உண்மை என்ன?

பரப்பப்படும் இந்த புகைப்படத்தை ‘Reverse Image Search’ முறையில் தேடுகையில், 2016ஆம் ஆண்டிலிருந்து இந்த புகைப்படம் விமானப் பயணம் சம்பந்தமான விளம்பரங்களிலும், செய்திகளிலும் இடம்பெற்றிருப்பதைக் காணமுடிகிறது. 

‘முன்னாள் ஜனாதிபதி ராம்நாத் கோவிந்த் மகள் விமானப் பணிப்பெண்ணாக பணியாற்றியது’ குறித்து இணையத்தில் தேடுகையில், ‘The Indian EXPRESS’ செய்தித்தளத்தில் ஒரு செய்தியைக் காணமுடிந்தது. 2017ஆம் ஆண்டு நவம்பர் மாதம் வெளியிடப்பட்டுள்ள அந்த செய்தியில், ‘ராம்நாத் கோவிந்த்-ன் மகள் சுவாதி, போயிங் 777 மற்றும் 787 விமானங்களில் பணிப்பெண்ணாக பணியாற்றிதாகவும் பின்னர் 2017 அக்டோபர் மாதத்தில் ஏர் இந்தியா நிறுவனத்தின் தலைமை அலுவலகத்தில் உள்ள ஒருங்கிணைப்புத் துறைக்கு மாற்றப்பட்டு விட்டதாகவும்’ குறிப்பிடப்பட்டுள்ளது. இந்தத் துறை, இந்தியன் ஏர்லைன்ஸ் மற்றும் ஏர் இந்தியா 2007ஆம் ஆண்டு இணைக்கப்பட்ட போது அவற்றின் மனிதவளத்தை மேற்பார்வை செய்யும் ஒன்றாகும். 

மேலும் தேடியதில், ’Firstpost’ செய்தித்தளத்தில் வெளியிடப்பட்டுள்ள செய்தியிலும் இதே தகவல் குறிப்பிடப்பட்டுள்ளது. ஜனாதிபதியின் மகள் என்பதால் அவருக்கு பாதுகாப்பு தேவைப்படும், ஆனால் அவர் தனது பாதுகாப்பு வீரர்களுடன் விமானத்தில் பயணித்தால் அந்த விமானத்தில் பயணம் செய்யும் வாடிக்கையாளர்களுக்கான இருக்கைகள் குறையும். இதனால் தான் அவர் விமானத்தில் பயணம் செய்யத் தேவையில்லாத வகையில் அலுவலகப் பணிக்கு அவர் மாற்றப்பட்டிருக்கிறார் என்றும் குறிப்பிடப்பட்டுள்ளது.

மேலும், இந்த செய்திகளில் வெளியிடப்பட்டுள்ள சுவாதி கோவிந்த்-ன் புகைப்படங்கள் பரப்பப்படும் புகைப்படத்தில் இருக்கும் பெண்ணுடன் ஒத்துப்போகவில்லை என்பதும் குறிப்பிடத்தக்கது. 

மேற்குறிப்பிடப்பட்டுள்ள விவரங்களிலிருந்து, முன்னாள் இந்திய ஜானதிபதி ராம்நாத் கோவிந்தின் மகளான ஸ்வாதி, விமானப் பணிப்பெண்ணாக வேலை செய்தது உண்மையே. ஆனால் 2017 ஆண்டில் பாதுகாப்பு காரணம் கருதி ஏர் இந்தியாவின் ஒருங்கிணைப்புத் துறைக்கு  மாற்றப்பட்டுவிட்டார்.

முடிவு:

பரவி வரும் புகைப்படத்தில் இருப்பது ஸ்வாதி கோவிந்த் அல்ல. இணையத்தில் இருக்கும் வேறொரு புகைப்படத்தை பதிவிட்டு, இவர் தான் விமான பணிப்பெண்ணாக வேலை செய்த முன்னாள் இந்திய ஜானதிபதி ராம்நாத் கோவிந்தின் மகளான ஸ்வாதி என்று திரித்து பரப்பப்படுகிறது.