அறநிலையத்துறை கமிஷனர் கவிதாவிடம் பத்து பவுன் நகை பறிக்கப்பட்டதாக பரவும் செய்தி! உண்மை என்ன?

மதுரையில் நடந்தது சங்கிகள் மாநாடு..

திருச்செந்தூர் குடமுழுக்கு  தான் முருக பக்தர்கள் மாநாடு - சினேக் பாபு..!

மதுரையில் பாதுகாப்புக்கு ஒரு போலீஸ் கூட இல்லை. எந்த அசம்பாவிதமும் இல்லை.

ஆனால் திருச்செந்தூரில் ஆறாயிரம் போலீஸ் காவல் இருந்தும் 50 பவுனுக்கும் மேற்பட்ட நகைகள் கொள்ளை.

இதுல ஹைலைட் என்னன்னா..?

*அறநிலையத்துறை கமிஷனர் கவிதாவிடம் பத்து பவுன் நகை பறிப்பு..*

இப்ப புரியுதா சங்கிகள் மாநாட்டிற்கும் திராவிடம்(களவானி) கூட்டும் கூட்டத்திற்கும் உள்ள வித்தியாசம்....?

X Link | Archived Link

அண்மையில் மதுரையில் இந்து முன்னணி சார்பில் முகருன் மாநாடு நடைபெற்று முடிந்தது. இந்நிலையில் முருகன் மாநாட்டின் போது ஒரு போலீஸ் கூட பாதுகாப்பிற்கு இல்லை என்றும், எந்த அசம்பாவிதமும் நடைபெறவில்லை எனவும் பதிவிட்டுள்ளனர். மேலும் திருச்செந்தூர் குடமுழுக்கில் ஆறாயிரம் போலீஸ் காவல் இருந்தும் 50 பவுனுக்கும் மேற்பட்ட நகைகள் கொள்ளையடிக்கப்பட்டதாகவும், அறநிலையத்துறை கமிஷனர் கவிதாவிடம் பத்து பவுன் நகை பறிக்கப்பட்டதாகவும் அதில் குறிப்பிடப்பட்டிருந்தது. 

உண்மை என்ன?

முதலில் முருகன் மாநாட்டில் காவல்துறை பாதுகாப்பு இல்லையா என்பது குறித்து தேடி பார்த்தோம். அப்போது இந்து தமிழ் ஊடகத்தில், ஜூன் 21, 2025 அன்று "முருக பக்தர்கள் மாநாடு: மதுரையில் குவியும் பக்தர்கள் - 1,500 போலீஸார் பாதுகாப்பு" என்ற தலைப்பில் செய்தி வெளியாகியிருந்ததை பார்க்கமுடிந்தது. அதில் இந்த மாநாட்டுக்கு தமிழகம் முழுவதிலும் இருந்து 5 லட்சம் பேர் வருவார்கள் என எதிர்பார்ப்பதாக மாநாட்டு ஏற்பாட்டாளர்கள் தெரிவித்ததாகவும், இதனால் மாநகர காவல் ஆணையர் லோக நாதன், மாவட்ட காவல் கண்காணிப்பாளர் அரவிந்த் ஆகியோர் தலைமையில் 1,500 போலீஸார் பாதுகாப்புப் பணியில் ஈடுபட்டுள்ளதாகவும் குறிப்பிடப்பட்டிருந்தது. 

இதையடுத்து திருச்செந்தூர் குடமுழுக்கின் போது அறநிலையத்துறை கமிஷனர் கவிதாவிடம் பத்து பவுன் நகை பறிக்கப்பட்டது குறித்து செய்தி வெளியிடப்பட்டுள்ளதா என்பதை தேடி பார்த்தோம். இது குறித்தான எந்த செய்தியும் ஊடகங்களில் வெளியாகவில்லை என்பதை பார்க்கமுடிந்தது.

மாறாக விகடன் ஊடகப் பக்கத்தில் "சர்ச்சையில் சிக்கிய அறநிலையத்துறை கூடுதல் ஆணையர் கவிதா சஸ்பெண்ட்’ - தமிழக அரசு நடவடிக்கை" என்ற தலைப்பில் அக்டோபர் 10, 2018 அன்று ஒரு செய்தி வெளியாகியிருந்ததை பார்க்கமுடிந்தது. அதில் காஞ்சிபுரம் ஏகாம்பரநாதர் கோயிலில் சோமாஸ் கந்தர் சிலையை பழுது பார்க்கும் போது, முறைகேடு நடந்ததாக இந்து அறநிலையத்துறை கூடுதல் ஆணையர் கவிதா திடீர் சஸ்பெண்ட் செய்யப்பட்டதாகவும் தெரிவிக்கப்பட்டிருந்தது. 

முடிவு: 

நம் தேடலில், முருகன் மாநாட்டில் காவல்துறை பாதுகாப்பு இல்லை என்றும், திருச்செந்தூர் குடமுழுக்கின் போது அறநிலையத்துறை கமிஷனர் கவிதாவிடம் பத்து பவுன் நகை பறிக்கப்பட்டதாகவும் பாஜகவினர் பரப்பிய செய்தி தவறானது என்பது தெரியவந்தது.