வன்முறையை தூண்டிய உளவாளிகளை கைது செய்த ஈரான் என்று பரவும் புகைப்படம்! உண்மை என்ன?

ஈ+ரா+னி+ல் ஆக்கிரமிப்பு பகுதியிலிருந்து வந்து திருட்டு தனமாக உளவு பார்த்து கலவரத்தை செய்த கொடியவர்களை ஈ+ரா+னி+ய குடியரசுப்படை கைது செய்து பொதுமக்கள் மத்தியில் ஊர்வலமாக அழைத்து சென்றனர்.

Facebook Link / Archived Link 

ஈரானில் தற்போது நிகழ்ந்து வரும் போராட்டங்களைத் தூண்டிவிட்டதாக உளவாளிகள் சிலரை ஈரான் பாதுகாப்புப் படை கைது செய்ததாக புகைப்படம் ஒன்றைப் பலரும் சமூக ஊடகங்களில் பதிவிட்டு வருகின்றனர். 

உண்மை என்ன? 

பரவி வரும் புகைப்படத்தை கூகுள் ரிவர்ஸ் இமேஜ் மூலம் தேடினோம். Israel hayomன்ற ஊடகப்பக்கத்தில் “Iran celebrates revolution by re-enacting capture of US sailors” என்ற தலைப்பில் பிப்ரவரி 12, 2016 அன்றே பரவி வரும் புகைப்படத்துடன் செய்தி வெளியிட்டுருந்தது. அதில்  2016ம் ஆண்டு ஜனவரி மாதம் ஈரானின் இஸ்லாமிக் ரெவல்யூஷனரி கார்டு கார்ப்ஸ் (Islamic Revolutionary Guard Corps Navy) அமெரிக்க கடற்படை மாலுமிகளை சிறைபிடித்தனர். அந்த ஆண்டு ஈரான் தலைநகர் தெஹ்ரானில் நடந்த “ஈரான் புரட்சி தின”  பேரணியின் போது அமெரிக்க மாலுமிகளை சிறைபிடித்த காட்சியை பாதுகாப்புப் படை வீரர்கள் நடித்துக் காட்டினர் என்று குறிப்பிடப்பட்டிருந்தது.

இது குறித்து மேலும் தேடிய போது, AP Newsroom ஊடகப்பக்கத்திலும் பரவி வரும் புகைப்படத்துடன் பிப்ரவரி 11, 2016 அன்று செய்தி வெளியாகியிருந்தது. அதிலும்  2016ம் ஆண்டில் நடந்த “ஈரான் புரட்சி தின” அணிவகுப்பில் ஈரான் பாதுகாப்பு படையினர் நடத்திய நாடகத்தின் புகைப்படம் என்றே குறிப்பிடப்பட்டிருந்தது. 

முடிவு: 

கிடைத்திருக்கும் ஆதாரங்களின் படி, கடந்த 2016ம் ஆண்டில் நடந்த “ஈரான் புரட்சி தின” அணிவகுப்பில் ஈரான் பாதுகாப்பு படையினர் நடத்திய நாடகத்தின் புகைப்படம் இது. இந்த பழைய புகைப்படத்தை தற்போது 'ஈரானில் வன்முறையைத் தூண்டிய உளவாளிகள் கைது' எனக் கூறி தவறாகப் பரப்பி வருகின்றனர்.