யூடர்ன் தீர்ப்பு
YouTurn Verdict
சரிபார்க்கப்பட்ட கூற்று
கடந்த 2020ஆம் ஆண்டு பிப்ரவரியில் நடைபெற்ற இந்திய பட்ஜெட் கூட்டத்தொடரில் தயாநிதிமாறன் பேசியபோது எடுக்கப்பட்ட பழைய வீடியோ இது.
பரவிய செய்தி
ரஜினிக்கு வரிசலுகை அளித்த வருமானவரித்துறை விஜய்யை மட்டும் குறி வைப்பது ஏன்? - தயாநிதி மாறன்
விரிவான விளக்கம்
“தமிழக வெற்றிக் கழகத்தின் தலைவர் விஜய்க்கு, ரூ 15 கோடி வரி ஏய்ப்புக்காக, வருமான வரித் துறை ரூ 1.50 கோடி அபராதம் விதித்தது செல்லும்” என சென்னை உயர்நீதிமன்றம் சமீபத்தில் தீர்ப்பு வழங்கியது.
இந்நிலையில், “நடிகர் ரஜினிக்கு மட்டும் விலக்கு அளிக்கும் அதே வருமான வரித்துறை, நடிகரை விஜய்யை மட்டும் குறி வைப்பது ஏன்?” என திமுக எம்பி தயாநிதி மாறன் பேசுவது போன்ற வீடியோ ஒன்றை பலரும் சமூக ஊடகங்களில் தற்போது வைரலாகப் பரப்பி வருகின்றனர். மேலும் பரவி வரும் பதிவுகளில் விஜய்க்கு ஆதரவாக தயாநிதி மாறன் பேசியுள்ளார் என்றும் குறிப்பிட்டு பரப்பி வருகின்றனர்.
விஜய்க்காக நாடாளுமன்றத்தில் குரல் கொடுத்த வேட்டைக்காரன், சுறா, சர்க்கார் மற்றும் பீஸ்ட் பட தயாரிப்பாளர் கலாநிதிமாறனின் தம்பியும், குருவி பட தயாரிப்பாளர் உதயநிதியின் உறவுக்காரர் தயாநிதி மாறன் அவர்கள் 🖤❤️
pic.twitter.com/9d0SapGNJm
உண்மை என்ன?
பரவி வரும் வீடியோ குறித்து ஆய்வு செய்து பார்த்ததில், இது தற்போது எடுக்கப்பட்ட வீடியோ அல்ல என்பதை அறிய முடிந்தது.
கடந்த 2020 ஆம் ஆண்டு பிப்ரவரி மாதம், “The Economic Times“ யூடியூப் பக்கத்தில் “'விஜய் அரசியல் ரீதியாக குறிவைக்கப்படுகிறார்': வருமான வரித்துறை சோதனைகள் குறித்து தயாநிதி மாறன்“ என்று குறிப்பிட்டு செய்தி வெளியிட்டிருந்தனர். இதன் மூலம் இது கடந்த 2020 ஆம் ஆண்டு நடைபெற்ற பழைய சம்பவம் என்பதை அறிய முடிகிறது.
கடந்த 2020ஆம் ஆண்டு நடைபெற்ற இந்திய பட்ஜெட் கூட்டத்தொடரில் பேசிய திமுக எம்பியான தயாநிதிமாறன் “வருமானவரித்துறை மாற்று மனப்பான்மையுடன் நடந்துகொள்கிறது. நடிகர் ரஜினிக்கு வரிவிதிப்பில் இருந்து விலக்கு அளிக்கிறீர்கள். அதே வருமான வரித்துறை நடிகர் விஜய்யை படப்பிடிப்பில் இருந்து அழைத்து வந்து பாரபட்சமாக நடத்துகிறது” என்றும் பேசியிருந்தார். இதை “BBC News Tamil“ யூடியூப் பக்கத்தில் கடந்த 2020 பிப்ரவரி 10 அன்று வெளியிடப்பட்ட செய்தி மூலம் தெளிவாக அறிய முடிகிறது.
இதன் மூலம், கடந்த 2020ஆம் ஆண்டு பிப்ரவரியில் நடைபெற்ற இந்திய பட்ஜெட் கூட்டத்தொடரில் தயாநிதிமாறன் பேசியபோது எடுக்கப்பட்ட பழைய வீடியோ இது என்பது உறுதியாகிறது. விஜய் அப்போது தவெக கட்சியை ஆரம்பித்திருக்கவில்லை என்பதும் குறிப்பிடத்தக்கது.
முடிவு:
நம் தேடலில், “நடிகர் ரஜினிக்கு மட்டும் விலக்கு அளிக்கும் அதே வருமான வரித்துறை, நடிகரை விஜய்யை மட்டும் குறி வைப்பது ஏன்?” என விஜய்க்கு ஆதரவாக தயாநிதி மாறன் பேசியுள்ளார் எனப் பரவும் வீடியோ, கடந்த 2020 ஆம் ஆண்டு எடுக்கப்பட்டது என்பது உறுதியாகிறது.
