வாக்காளர்களுக்கு பரிசு பொருள் வழங்கிய அமைச்சர் முத்துச்சாமி என்று பரவும் பழைய வீடியோ!

டாஸ்மாக் துறை அமைச்சருக்கு ஈரோடு முத்துச்சாமி வாக்காளர்களுக்கு பரிசு பொருள் கொடுக்கும் அந்த காணொளி இணையதளங்களில் வைரலாகி வருகிறது…

X Link / Archived Link

தமிழ்நாடு சட்டமன்ற தேர்தலுக்கான வாக்குப்பதிவு ஏப்ரல் 23ஆம் தேதி நடைபெறுகிறது. தேர்தல் மே 4ஆம் தேதி வெளியாகும் என்று தேர்தல் ஆணையம் அறிவித்துள்ளது. இதற்காக அனைத்து கட்சிகளும் தங்களது தேர்தல் பிரச்சாரத்தை தீவிரப்படுத்தியுள்ளனர். தமிழ்நாடு முழுவதும் தேர்தல் நடத்தை விதிகள் அமலுக்கு வந்துள்ளன. 

இந்நிலையில் அமைச்சர் முத்துச்சாமி ஈரோட்டில் வாக்காளர்களுக்கு பரிசு பொருட்கள் வழங்குவது போன்ற காணொளி ஒன்று சமூக ஊடகங்களில் வைரலாகி வருகிறது. 

டாஸ்மாக் துறை அமைச்சருக்கு ஈரோடு முத்துச்சாமி வாக்காளர்களுக்கு பரிசு பொருள் கொடுக்கும் அந்த காணொளி இணையதளங்களில் வைரலாகி வருகிறது..

இது எப்போது எடுக்கப்பட்டது என தேர்தல் ஆணையம் விசாரிக்குமாpic.twitter.com/xoXGMXyfhd

— கழுகுப்பார்வை 🦅🇮🇳 (@TheEagle3_0) March 16, 2026

உண்மை என்ன? 

பரவி வரும் இந்த வீடியோ குறித்து கூகுள் ரிவர்ஸ் இமேஜ் மூலம் தேடிப் பார்த்தோம். அப்போது விகடன் ஊடகத்தில் ”`இரண்டு மினி லாரிகளில் வந்த பரிசுப்பொருள்கள்’ - ஸ்டாலின் பிறந்தநாளுக்காக வழங்கிய அமைச்சர் முத்துசாமி” என்ற தலைப்பில் மார்ச் 25, 2023 அன்று பரவி வரும் வீடியோ காட்சிகளை வைத்து செய்தி ஒன்று வெளியாகியிருந்தது. அதில் அமைச்சர் சு.முத்துசாமியின் சொந்தத் தொகுதியான ஈரோடு மேற்கு தொகுதிக்குட்பட்ட சுமார் 400 பேருக்கு முதல்வர் மு.க.ஸ்டாலின் பிறந்தநாளையொட்டி பரிசுப் பெட்டகம் வழங்கப்பட்டது என்று குறிப்பிடப்பட்டிருந்தது. 

அதே போல் News Uriyadi ஊடகப்பக்கத்தில் அக்டோபர் 17, 2023 அன்று இது குறித்து செய்தி வெளியாகியிருந்தது. அதில் ஈரோட்டில் முத்தமிழறிஞர் கலைஞரின் நூற்றாண்டுவிழாவை முன்னிட்டு அமைச்சர் சு.முத்துசாமி பொதுமக்களுக்கு நலத்திட்ட உதவிகள் வழங்கினார்.  தொடர்ந்து மக்களின் குறைகள் கேட்டறிந்த அமைச்சர், சம்மந்தபட்ட அரசு துறைசார்ந்த அதிகாரிகள் மூலம் உரிய நடவடிக்கை எடுப்பதாக கூறினார் என்று குறிப்பிடப்பட்டிருந்தது. 

இது குறித்து மேலும் தேடிய போது, Minister Muthusamy Team என்ற இன்ஸ்டாகிராம் பக்கத்திலும் 24 டிசம்பர், 2023 அன்று இது குறித்தான புகைப்படங்கள் பதிவாகியிருந்ததை பார்க்கமுடிந்தது. 

முடிவு: 

எனவே, ஈரோடு அமைச்சர் முத்துச்சாமி வாக்காளர்களுக்கு பரிசு பொருள் கொடுக்கும் வீடியோ என்று பரவுவது தவறானவை. பரவி வரும் வீடியோ 2023ஆம் ஆண்டு முன்னாள் முதலமைச்சர் கலைஞரின் நூற்றாண்டு விழா மற்றும் தமிழ்நாடு முதலமைச்சர் மு.க.  ஸ்டாலின் பிறந்தநாளை முன்னிட்டு பரிசு பொருட்கள் வழங்கிய போது எடுக்கப்பட்டதாகும்.