விலை குறைந்த இயற்கை எரிவாயு சிலிண்டர்கள் என்று பரப்பப்படும் வீடியோ! உண்மை என்ன?

மாட்டுச் சாணத்தில் இருந்து தயாரான 18 கிலோ எடை கொண்ட இந்த இயற்கை எரிவாயு சிலிண்டர் வெறும் 500 ரூபாய். உத்தரகாண்ட் மாநிலத்தைச் சேர்ந்த இரு சகோதரர்கள் மாட்டுச் சாணத்திலிருந்து (Gobar Gas) இயற்கை எரிவாயுவை சேமித்து சிலிண்டர்களில் அடைக்கும் புதிய முயற்சியை மேற்கொண்டுள்ளனர். 

Facebook Link

நீல நிறத்தில் இருக்கும் சிலிண்டர்களை சரக்கு வாகனத்தில் ஏற்றும் வீடியோயில் ’இந்த சிலிண்டர்களில் இருப்பது மாட்டுச் சாணத்தில் இருந்து தயாரிக்கப்பட்ட இயற்கை எரிவாயு (Gobar Gas) என்றும், 18 கிலோ எடை கொண்ட இந்த சிலிண்டரின் விலை வெறும் 500 ரூபாய் மட்டுமே’ என்றும் குறிப்பிடப்பட்டுள்ளது. உத்தரகாண்ட் மாநிலத்தைச் சேர்ந்த சகோதரர்கள் இருவர் இதானை விற்பனை செய்வதாகவும் அதில் குறிப்பிடப்பட்டுள்ளது. சுற்றுச்சூழலுக்கு உகந்ததாக இந்த எரிவாயு இருக்குமென்று கூறி தமிழ்நாட்டில் தற்சார்பு வாழ்க்கை பற்றி பேசும் பேஸ்புக் பக்கத்தில் இந்த வீடியோவை பரப்புகிறார்கள். 

உண்மை என்ன?

இது குறித்து இணையத்தில் தேடியபோது, இந்த சிலிண்டர் இயற்கை எரிவாயு சிலிண்டர் அல்ல, ’Indian Oil’ நிறுவனத்தால் அறிமுகப்படுத்தப்பட்ட ’Indane XTRATEJ’ வகை LPG சிலிண்டர் என்பது தெரிய வருகிறது. 

இது குறித்து  ’Indian Oil’ நிறுவனத்தின் அதிகாரப்பூர்வ தளத்தில், ‘இது மற்ற LPG சிலிண்டர்களில் இருந்து வித்தியாசமானது (differentiated) என்றும், அதில் நானோ அளவிலான சில சேர்க்கைப் பொருட்கள் (nano-additive) உள்ளதாகவும்’ குறிப்பிட்டுள்ளது. 

மேலும், இது மற்ற LPG சிலிண்டர்களை விட 65 டிகிரி செல்சியஸ் அதிக வெப்பத்தை உருவாக்க வல்லது. இதனால், 5 சதவீதம் வரை எரிவாயு சேமிக்க முடியும்  என்றும், 14 சதவீதம் வரை சமையல் நேரத்தை குறைக்க முடியும் என்றும் குறிப்பிடப்பட்டுள்ளது. 

இதிலிருந்து, பரப்பப்படும் வீடியோவில் உள்ள சிலிண்டர்கள் ’Indian Oil’ நிறுவனத்தால் அறிமுகப்படுத்தப்பட்ட  நானோ சேர்க்கைப் பொருட்கள் கலந்த LPG சிலிண்டர் தான் என்பது உறுதியாகிறது.

முடிவு:

நானோ சேர்க்கைப் பொருட்கள் கலந்த LPG சிலிண்டர்களை இயற்கை எரிவாயு சிலிண்டர்கள் என்று இணையத்தில் தவறாக பரப்புகிறார்கள்.