யூடர்ன் தீர்ப்பு
YouTurn Verdict
சரிபார்க்கப்பட்ட கூற்று
போக்ஸோ வழக்குகளிலும், பெண்கள் மீதான பாலியல் குற்ற வழக்குகளிலும் தமிழ்நாட்டில் Conviction Rate என்பது 27.5 சதவீதமாகும்.
பரவிய செய்தி
‘2023 ஆம் ஆண்டில் தமிழ்நாட்டில் 6968 POCSO வழக்குகள் பதிவாகியுள்ளது. அவற்றில் 3 சதவீதத்திற்கும் குறைவான வழக்குகளில் மட்டுமே குற்றம் நிரூபிக்கப்பட்டு (Conviction Rate) குற்றவாளி தண்டிக்கப்பட்டிருக்கிறார்கள்’ - தமிழ்நாடு முஸ்லீம் லீக் கட்சியின் தலைவர் முஸ்தபா.
விரிவான விளக்கம்
’ஆகாயம் தமிழ்’ என்ற யூட்யூப் தளத்தில் விவாத நிகழ்ச்சி ஒன்றில் பேசிய தமிழ்நாடு முஸ்லீம் லீக் கட்சியின் தலைவர் முஸ்தபா, ‘2023 ஆம் ஆண்டில் தமிழ்நாட்டில் 6968 POCSO வழக்குகள் பதிவாகியுள்ளது. ஆனால் அவற்றில் 3 சதவீதத்திற்கும் குறைவான வழக்குகளில் மட்டுமே குற்றம் நிரூபிக்கப்பட்டு (Conviction Rate) குற்றவாளி தண்டிக்கப்பட்டிருக்கிறார்கள்’ என்று பேசினார்.
உண்மை என்ன?
தமிழ்நாட்டில் போக்ஸோ வழக்குகளின் Conviction Rate குறித்து இணையத்தில் தேடினோம். மகளிர் மற்றும் குழந்தைகள் மேம்பாட்டு அமைச்சகம் இது தொடர்பாக நாடாளுமன்றத்தில் சமர்பித்திருந்த தரவுகளை காணமுடிந்தது.
அதன்படி, 2023ஆம் ஆண்டில் தமிழ்நாட்டில் 6968 குழந்தைகளுக்கு எதிரான குற்ற வழக்குகள் (Crimes against Children) பதியப்பட்டுள்ளது. இதில் எல்லாமே போக்ஸோ வழங்குகள் என்று அர்த்தமில்லை. முதலில் முஸ்தபா குழந்தைகளுக்கு எதிரான குற்ற வழக்குகள் எல்லாம் போக்ஸோவின் கீழ் வரும் என்று தவறாக புரிந்து கொண்டிருக்கிறார். குழந்தைகளை வேலைகளில் சட்டவிரோதமாக ஈடுபடுத்துவது, குழந்தைகளை கடத்தல் செய்வது போன்ற குற்றங்கள் கூட ’Crimes against Children’ என்ற வகைமையின் கீழ் தான் வரும்.
மேலும், மேற்கூறிய 6968 வழக்குகளில் 962 வழக்குகளுக்கு குற்றம் நிரூபிக்கப்பட்டு, குற்றவாளிகள் தண்டிக்கப்பட்டிருக்கிறார்கள். இதன் Conviction Rate என்பது 27.5 சதவீதமாகும்.
அதேபோல், தமிழ்நாட்டில் மொத்தம் 20 Fast Track Special Courts (FTSC) நீதிமன்றங்கள் உள்ளது. இதில் exclusive POCSO (e-POCSO) என்று சொல்லப்படும் போக்ஸோ சிறப்பு நீதிமன்றங்களும் அடங்கும். போக்ஸோ சிறப்பு நீதிமன்றங்களில் போக்ஸோ வழக்குகள் மட்டுமே விசாரிக்கப்படும். ஆனால் ’FTSC’ நீதிமன்றங்களில் பெண்கள் மீதான கொடூரமான பாலியல் குற்ற வழங்குகளும் விசாரிக்கப்படும். மேற்குறிப்பிட்ட இந்த 20 சிறப்பு நீதிமன்றங்களில் 2025ஆம் ஆண்டின் இறுதியில் 8334 வழக்குகள் நிலுவையில் இருந்திருக்கிறது. இந்த நீதிமன்றங்களில் நடக்கும் வழக்குகளின் Conviction Rate 2025ஆம் ஆண்டு 27.51 சதவீதமாக இருந்திருக்கிறது.
மேற்கூறிய விவரங்களிலிருந்து, போக்ஸோ வழக்குகளிலும், பெண்கள் மீதான பாலியல் குற்ற வழக்குகளிலும் தமிழ்நாட்டில் Conviction Rate என்பது 27.5 சதவீதமாக இருப்பது தெரிய வருகிறது.
முடிவு:
குழந்தைகளுக்கு எதிரான குற்ற வழக்குகளில் தமிழ்நாட்டின் ‘Conviction Rate’ 3 சதவீதத்திற்கும் குறைவு என்று தவறான தகவலை பரப்பி வருகிறார் தமிழ்நாடு முஸ்லீம் கட்சித் தலைவர் முஸ்தபா.
