வணிக வரி என்றாலே GST வரிதான் என்று பரப்பப்படும் தவறான கருத்து!

தமிழக முதல்வரோ ஜிஎஸ்டி அமல்படுத்தபட்ட பிறகு தமிழ்நாட்டின் வரி வருவாய் குறைந்து விட்டது என புலம்பி வருகிறார்,
அமைச்சர் மூர்த்தியோ திமுக ஆட்சிக்கு வந்த பிறகு 2020-21ல் ₹85,867 கோடியாக இருந்த வணிகவரி 2024-25ல் ₹1,38,120 ஆக உயர்ந்து உள்ளது என பெருமை பேசி வருகிறார். இதில் கவனிக்க வேண்டிய முக்கியமான விஷயம் வணிகவரி =ஜிஎஸ்டி.
பொய்யும் புரட்டும் பேசியே நான்காண்டு காலம் ஆட்சியை நடத்தி விட்டது திமுக.
இதையெல்லாம் Fack Check பண்ணலாமே @youturn_in @tn_factcheck ?

Link / Archive Link

கடந்த ஏப்ரல் 23ஆம் தேதியன்று சட்டசபையில் விவாதத்திற்கு பதிலளிக்கையில் வணிக வரி மற்றும் பதிவுத்துறை அமைச்சர் மூர்த்தி, “மாநில அரசின் வரி வருவாயில் வணிக வரித்துறை வாயிலாக, 71.6 சதவீதமும், பதிவுத்துறை வாயிலாக, 15.4 சதவீதம் பெறப்படுகிறது... தி.மு.க ஆட்சிக்கு வந்து பின்னர் கடந்த  நான்கு ஆண்டுகளில் வணிக வரித்துறை 5.08 லட்சம் கோடி ரூபாய் வருவாய் ஈட்டியுள்ளது” என்று பேசினார்.

இந்நிலையில், தமிழ்நாடு பாஜகச் சேர்ந்த P.S.செல்வக்குமார் என்பவர், ‘தமிழக முதல்வரோ ஜிஎஸ்டி அமல்படுத்தபட்ட பிறகு தமிழ்நாட்டின் வரி வருவாய் குறைந்து விட்டது என புலம்பி வருகிறார்' என்றும் ‘கடந்த நான்காண்டுகளில் மாநில ஜிஎஸ்டி வசூல் ரூ.5.08 லட்சம் கோடி என்று சொல்லாமல், அமைச்சர் மூர்த்தி வணிகவரி என்று சொல்கிறார். ஜிஎஸ்டி வரி என்பதை திரித்து வணிகவரி மாற்றிக் கூறுவதாக’ தனது சமூக வலைத்தள பக்கத்தில் பரப்பிவருகிறார். 

தமிழக முதல்வரோ ஜிஎஸ்டி அமல்படுத்தபட்ட பிறகு தமிழ்நாட்டின் வரி வருவாய் குறைந்து விட்டது என புலம்பி வருகிறார்,
அமைச்சர் மூர்த்தியோ திமுக ஆட்சிக்கு வந்த பிறகு
2020-21ல் ₹85,867 கோடியாக இருந்த வணிகவரி
2024-25ல் ₹1,38,120 ஆக உயர்ந்து உள்ளது என பெருமை பேசி வருகிறார்.

இதில்… pic.twitter.com/KpoytPecC1

— Selva Kumar (@Selvakumar_IN) April 24, 2025

உண்மை என்ன?

நடப்பு நிதியாண்டில் தமிழ்நாட்டின் வணிக வரி பற்றி தேடிய போது, வணிக வரி மற்றும் பதிவுத்துறை அமைச்சகம் வெளியிட்டுள்ள ‘வணிக வரிகள் - 2025-26:Policy Note’ என்ற ஆவணத்தை காணமுடிந்தது. 

இந்த ஆவணத்தில் கடந்த 2020-2021 முதல் 2024-2025 நிதியாண்டு வரையில் வெவ்வேறு பிரிவுகளின் கீழ் வசூலிக்கப்பட்ட வரிகள் பற்றிய விவரங்கள் கொடுக்கப்பட்டிருக்கிறது. அதன் 2020-21 நிதியாண்டில் வணிக வரி, மத்திய அரசால் வழங்கப்படும் GST இழப்பீட்டு தொகையை சேர்க்காமல் ரூ.85,867.86 கோடியாக இருந்தது. இது 2024-25 நிதியாண்டில் வணிக வரி ரூ.1,38,120.10 கோடியாக உயர்ந்துள்ளதாக தெரிவிக்கிறது. 

வணிக வரிப் பிரிவுகளில் Non GST வரி என்ற தனிப் பிரிவு இருப்பதை காணமுடிகிறது. பெட்ரோல், மது போன்ற சரக்குகளில் இருந்து ஈட்டப்படும் வருவாய் இந்த GST அல்லாத (Non GST) வரிகள் மூலமாகத்தான் ஈட்டப்படுவதாக குறிப்பிடப்பட்டுள்ளது. இவ்வாறு GST அல்லாத (Non GST) வரிகளை வசூலிக்க மாநில அளவில் சட்டங்கள் இருப்பதும் குறிப்பிடத்தக்கது. தமிழ்நாட்டில் பெட்ரோல், மதுபானத்திற்கு TNVAT Act - 2006, CST Act - 1956 ஆகிய சட்டங்களின் கீழ் வரி வசூலிக்கப்படுகிறது.

மேலும், மாநில வணிக வரி வருவாயில் GST அல்லாத (Non GST) வரிகள், மதிப்புக் கூட்டு வரி (VAT), State GST (SGST),  Interstate GST (IGST),  GST இழப்பீடுத் தொகை (GST Compensation) ஆகிய பிரிவுகள் இருக்கின்றன. இவ்வற்றுள், 2024-2025 நிதியாண்டில், GST அல்லாத (Non GST) வரிகளின் மூலமாக மட்டும் 44.96 சதவீத வருவாய் ஈட்டப்பட்டுள்ளதாக குறிப்பிடப்பட்டுள்ளது. 

இதிலிருந்து வணிக வரி என்றாலே GST மட்டுமே அல்ல, GST அல்லாத (Non GST) வரிகளும் அடக்கம் என்பது தெளிவாகிறது. மேலும், ஜிஎஸ்டி அமல்படுத்தபட்ட பிறகு தமிழ்நாட்டின் வரி வருவாய் குறைந்து விட்டது என யாரும் சொல்லவில்லை. மாறாக, ’தமிழ்நாடு ஒன்றிய அரசுக்கு அதிகமான வரி செலுத்தக்கூடிய மாநிலங்களில் ஒன்றாக இருந்தபோதும், ஒன்றிய அரசு தமிழ்நாட்டிற்கு போதிய நிதி ஒதுக்குவதில்லை’ என்று பேசப்பட்டு வருகிறது.

முடிவு:

வணிக வரி என்றாலே GST மட்டுமே என்ற தவறான புரிதலில் தமிழ்நாடு பாஜகவைச் சேர்ந்த P.S.செல்வகுமார் தவறான கருத்துகளை பரப்பிவருகிறார். ஆனால், GST அல்லாத (Non GST) வரிகளும் வணிக வரிகளில் அடங்கும் என்பதும், GST அல்லாத (Non GST) வரிகளின் மூலம்தான் அதிகமான வருவாய் ஈட்டப்படுகிறது என்பதும் குறிப்பிடத்தக்கது.