முன்னாள் உச்ச நீதிமன்ற நீதிபதி குரியன் ஜோசப் அளித்த ஒப்புதல் வாக்குமூலம் என்று தவறாக பரப்பப்படும் செய்தித் தலைப்பு!

"நான் ஒரு கிறுத்துவன் என்பதால் இந்துக்களுக்கு எதிராக தீர்ப்பு வழங்கவே என்னை காங்கிரஸ் ஆட்சியில் நீதிபதியாக அமர்த்தினார்கள், ஆனால் BJP ஆட்சியில் அது சாத்தியம்மில்லாமல் போனது" உச்ச நீதி மன்ற நீதிபதி ஜோசப் ஒப்புதல் வாக்குமூலம்.!!

X Link 

’We felt then CJI was being remote-controlled’ என்ற தலைப்புடன் இருக்கும் செய்தித்தாள் முகப்பு பக்கத்தை பதிவிட்டு, ‘நான் ஒரு கிறுத்துவன் என்பதால் இந்துக்களுக்கு எதிராக தீர்ப்பு வழங்கவே என்னை காங்கிரஸ் ஆட்சியில் நீதிபதியாக அமர்த்தினார்கள், ஆனால் BJP ஆட்சியில் அது சாத்தியம்மில்லாமல் போனது’ என்று முன்னாள் உச்ச நீதிமன்ற நீதிபதி குரியன் ஜோசப் ஒப்புதல் வாக்குமூலம் கொடுத்ததாகவும், அதுபற்றிய செய்தி நாளிதழில் வெளியிடப்பட்டிருப்பதாகவும் பாஜக ஆதரவாளர்களால் பரப்பப்படுகிறது. 

உண்மை என்ன:

பரப்பப்படும் தலைப்பைக் கொண்டு தேடுகையில் 2018 டிசம்பர் 3ஆம் தேதியன்று ’THE TIMES OF INDIA’ செய்தித்தளத்தில் வெளியான செய்தி ஒன்றைக் காணமுடிந்தது. அதில், ‘2018ஆம் ஆண்டு ஜனவரி 12ஆம் தேதியன்று குரியன் ஜோசப் மற்றும் பிற மூன்று உச்சநீதிமன்ற நீதிபதிகள் சேர்ந்து கொடுத்த பத்தரிகையாளர்கள் சந்திப்பு இந்திய அளவில் பெரும் பரப்பரப்பை ஏற்படுத்தியது பற்றி குறிப்பிடப்பட்டிருந்தது.

இந்த பத்திரிகையாளர் சந்திப்பில், அப்போதைய உச்ச நீதிமன்ற தலைமை நீதிபதி தீபக் மிஸ்ரா ‘வெளியிலிருந்து கட்டுப்படுத்தப்படுவதாகவும், அரசியல் சார்புடன் வழக்குகளுக்கு நீதிபதிகளை நியமிப்பதாகவும்’  குரியன் ஜோசப், செல்லமேஸ்வர், ரஞ்சன் கோகோய் மற்றும் மதன் லோகுர் ஆகிய  உச்சநீதிமன்ற நீதிபதிகள் கருத்து தெரிவித்தினர் என்பது குறிப்பிடத்தக்கது. உச்ச நீதிமன்ற நீதிபதிகள் இவ்வாறு வெளிப்படையாக பத்திரிகையாளர்கள் சந்திப்பு வைத்து தலைமை நீதிபதி பற்றி பேசியது இதுவே இந்திய நீதித்துறை வரலாற்றில் முதல்முறையாகும். 

இந்தியா முழுவதும் பெரும் தாக்கத்தை ஏற்படுத்திய இந்த பத்திரிகையாளர் சிந்திப்பு பற்றி 10 மாதங்களுக்கு பிறகு நீதிபதி குரியன் ஜோசப் கொடுத்த பேட்டி குறித்துதான் இந்த செய்தி வெளியிடப்பட்டிருக்கிறது.

எனவே, பரப்பப்படும் புகைப்படத்தில் உள்ள தலைப்பு, அப்போதைய உச்ச நீதிமன்ற தலைமை நீதிபதி தீபக் மிஸ்ரா மீது நீதித்துறை அமைப்பிற்கு வெளியிலிருந்து தாக்கம் செலுத்தப்படுவது குறித்து குரியன் ஜோசப் உள்ளிட்ட பிற நீதிபதிகள் முன்வைத்த விமர்சனத்தை பற்றியதாகும்.

இதனை திரித்து, நீதிபதி குரியன் ஜோசப் தான் இந்துக்களுக்கு எதிராக தீர்ப்பு வழங்கவே காங்கிரஸ் ஆட்சியில் நியமிக்கப்பட்டதாக ஒப்புதல் வாக்குமூலம் கொடுத்ததாக தவறாக பரப்பப்படுகிறது. 

முடிவு:

2018ஆம் ஆண்டில் உச்ச நீதிமன்ற தலைமை நீதிபதி தீபக் மிஸ்ரா பற்றி பத்திரிகையாளர் சந்திப்பில் பேசியது குறித்து குரியன் ஜோசப்  பேசியதை திரித்து, காங்கிரஸ் ஆட்சியில் இந்துக்களுக்கு எதிராக தீர்ப்பு வழங்கவே அவர் நியமிக்கப்பட்டதாகவும், ஆனால் பாஜக ஆட்சியில் அவ்வாறு செய்யமுடியவில்லை என்று அவர் ஒப்புதல் வாக்குமூலம் கொடுத்ததாகவும் தவறான பரப்புகிறார்கள்.