’இந்துக்கள் அசைவ உணவு உண்பதை மத்திய அரசு தடை செய்யவேண்டும்’ என எச்.ராஜா கூறினாரா? உண்மை என்ன?

இந்துக்கள் அசைவ உணவு உண்பதால்தான் திருப்பரங்குறத்தில் ஆடு பலியிடுவதை எந்த தாக்கமும் இல்லாமல் கடந்துபோகிறோம். இனி இந்துக்கள் அசைவ உணவு உண்பதையே மத்திய அரசு தடை செய்யவேண்டும். - ஹெச். ராஜா கோரிக்கை

X link

திருப்பரங்குன்றத்தில் அமைந்துள்ள சிக்கந்தர் தர்காவைவில் கந்தூரி எனப்படும் ஆடு பலியிடும் நிகழ்வை இஸ்லாமியர்கள் நடத்தக்கூடாது என இந்துத்துவா அமைப்புகள் தொடர் சர்ச்சையை ஏற்படுத்தி வருகிறது. இதன் ஒரு பகுதியாகத் திருப்பரங்குன்றம் மலையைக் காப்பதாகக் கூறி இந்து முன்னணி கடந்த 4ம் தேதி போராட்டத்தை நடத்தியது. இதில், பாஜக தலைவர் எச்.ராஜாவும் கலந்து கொண்டார். 

இந்துக்கள் அசைவம் உண்ணக்கூடாது
ஆனால்

இந்நிலையில் சிக்கந்தர் தர்கா விவகாரத்தில் எச்.ராஜா கூறியதாக நியூஸ் கார்டு ஒன்று பரப்பப்படுகிறது. அதில், ”இந்துக்கள் அசைவ உணவு உண்பதால்தான் திருப்பரங்குறத்தில் ஆடு பலியிடுவதை எந்த தாக்கமும் இல்லாமல் கடந்துபோகிறோம். இனி இந்துக்கள் அசைவ உணவு உண்பதையே மத்திய அரசு தடை செய்யவேண்டும்” என்று அவர் கூறியதாக உள்ளது.

அட பரதேசி பன்னாடை நாங்கள் ஹிந்துக்கள் இல்லடா ,சைவ ,கெளமார சமயத்தை சார்ந்தவர்கள் , எங்கள் உணவே ஆடு கோழி மாடு பன்றி போன்ற அசைவ உணவுகள் தான்டா !@HRajaBJP pic.twitter.com/E6pBCTFRCU

— ஆதிரன் 🇮🇳 ⚫🔴 (@Aathiraj8586) February 5, 2025

உண்மை என்ன?

பரவக் கூடிய நியூஸ் கார்டு புதிய தலைமுறை ஊடகத்தின் பெயரில் வெளியாகியுள்ளது. அதில், ’04.02.2025 - 8.10 PM’ என்ற தேதியும் நேரமும் குறிப்பிடப்பட்டுள்ளது. புதிய தலைமுறை ‘8.00, 8.30’ என அரைமணிநேர இடைவெளியில்தான் நியூஸ் கார்டில் நேரத்தை குறிப்பிடுவார்கள். 

எனவே, பரவக் கூடிய நியூஸ் கார்டு குறித்து புதிய தலைமுறை ஊடகத்தின் அதிகாரப் பூர்வ சமூக வலைத்தள பக்கங்களில் தேடினோம். அப்படி எந்த செய்தியும் அவர்கள் வெளியிடவில்லை என்பதை அறிய முடிந்தது. திருப்பரங்குன்றம் குறித்து எச்.ராஜா சமீபத்தில் பேசியவற்றிலும் பரவக் கூடியதில் இருப்பது போன்று எந்த கருத்தையும் தெரிவிக்கவில்லை.

மேற்கொண்டு தேடியதில், எச்.ராஜாவின் இதே புகைப்படத்துடன் 2024, டிசம்பர் மாதம் புதிய தலைமுறையில் வேறொரு நியூஸ் கார்டு வெளியாகி இருப்பதைக் காண முடிந்தது. அதில், “பெரியார் சிலை உடைப்பு குறித்து கருத்து தெரிவித்த வழக்கில் ஹெச்.ராஜா குற்றவாளி என சென்னை சிறப்பு நீதிமன்றம் தீர்ப்பு. பெரியார் சிலையை உடைப்பேன் எனவும், திமுக எம்.பி. கனிமொழிக்கு எதிராகவும் 2018ல் ஹெச்.ராஜா ட்விட்டரில் பதிவிட்டிருந்தார்” என்றுதான் உள்ளது. 

இவற்றிலிருந்து எச்.ராஜா குறித்து புதிய தலைமுறை ஊடகத்தில் பெயரில் பரவக் கூடிய நியூஸ் கார்டு போலியாக உருவாக்கப்பட்டது என்பதை அறிய முடிகிறது.

முடிவு: 

இந்துக்கள் அசைவ உணவு உண்பதையே மத்திய அரசு தடை செய்யவேண்டுமென எச்.ராஜா பேசியதாகப் பரவும் புதிய தலைமுறை நியூஸ் கார்டு போலியாக உருவாக்கப்பட்டது. எச்.ராஜாவும் அப்படிப் பேசவில்லை, புதிய தலைமுறையும் அப்படி ஒரு நியூஸ் கார்டை வெளியிடவில்லை.