முன்னாள் முதல்வர் கருணாநிதி வீட்டில் புகுந்த மழை நீர் என்று பரவும் பழைய புகைப்படம்!

திராவிடம் சாதித்தது…

மேலும் இந்த வீடு ஒரு பிராமணருடையது என்பது கித்னா பெயருக்கு தெரியும்

Facebook Link | Archived Link

முன்னாள் முதல்வர் கருணாநிதி அவர்களின் வீட்டின் வெளியே தண்ணீர் தேங்கக் கூடிய அளவில் வடிகால் அமைப்பு செய்து இருக்கிறார்கள் என்று கூறி புகைப்படம் ஒன்று வைரலாகி வருகிறது. 

உண்மை என்ன? 

பரவி வரும் புகைப்படத்தை கூகுள் ரிவர்ஸ் இமேஜ் மூலம் தேடிப் பார்த்தோம். அப்போது தினமலர் ஊடகத்தில், ”கருணாநிதி வீட்டில் மழை நீர் புகுந்தது” என்ற தலைப்பில் நவம்பர் 24, 2020 அன்று, பரவி வரும் புகைப்படத்துடன் ஒரு செய்தி வெளியாகியிருந்தது. அதில் ‛நிவர்' புயல் காரணமாக பெய்த தொடர் மழையால் முன்னாள் முதல்வர் கருணாநிதியின் கோபாலபுரம் வீட்டில் மழைநீர் புகுந்தது. அங்கு நிறுத்தப்பட்டிருந்த வாகனங்கள் மழைநீரில் மிதந்தன. மேலும் மழைநீர் உள்ளே புகாதவாறு அங்கு பணியாற்றி வரும் ஊழியர்கள் மழைநீரை வெளியேற்றி வந்தனர் என்று குறிப்பிடப்பட்டிருந்தது. 

இது குறித்து மேலும் தேடிய போது, அதே புகைப்படத்துடன் நவம்பர் 24, 2020 அன்று, ”முன்னாள் முதல்வர் கருணாநிதி வீட்டில் மீண்டும் புகுந்த மழை நீர்!” என்ற தலைப்பில் சமயம் தமிழ் ஊடகத்தில் செய்தி வெளியாகியிருந்தது. சென்னை கோபாலபுரத்தில் உள்ள முன்னாள் முதல்வர் முதல்வர் கருணாநிதி வீட்டிலும் மழை நீர் சூழ்ந்துள்ளது என்றும், அவரது இல்லத்தில் மழை நீர் புகுவது இது முதன்முறை அல்ல இதற்கு முன்பும் பல சமயங்களில் மழை பெய்யும் போது அவரது வீட்டில் வெள்ள நீர் புகுந்துள்ளது எனவும் தெரிவிக்கப்பட்டிருந்தது. 

இதே போல் இந்து தமிழ், One India Tamil போன்ற ஊடகங்களிலும் 2020ஆம் ஆண்டு பரவி வரும் புகைப்படத்துடன், இது குறித்து செய்தி வெளியாகியிருந்ததை பார்க்கமுடிந்தது. 

முடிவு: 

எனவே, கடந்த 2020 நவம்பரில் ‛நிவர்' புயல் வந்தபோது எடுக்கப்பட்ட புகைப்படத்தை, “முன்னாள் முதல்வர் கருணாநிதி அவர்களின் வீட்டின் வெளியே தண்ணீர் தேங்க கூடிய அளவில் வடிகால் அமைப்பு செய்து இருக்கிறார்கள்” என்று கூறி தற்போது பரப்பி வருகின்றனர். 2020ல் அதிமுக ஆட்சியில் இருந்தது என்பது குறிப்பிடத்தக்கது.