யூடர்ன் தீர்ப்பு
YouTurn Verdict
சரிபார்க்கப்பட்ட கூற்று
தெளிவான ஆதாரங்கள் இருக்கும் நிலையிலும் அதனை மறைத்துவிட்டு ரெட் பிக்ஸ் யூட்யூப் தளத்தில் பெலிக்ஸ் ஜெரால்ட் பச்சையான பொய்யை பரப்பிவருகிறார்
பரவிய செய்தி
‘தவெக தலைவர் கரூர் சம்பவம் நடந்த அன்று நாமக்கல் நகரத்திற்கு காலை 8.45 மணிக்கும் கரூர் நகரத்திற்கு பகல் 12 மணிக்கும் மக்களை சந்திக்க வருவார் என்று தவெக கட்சியின் அதிகாரப்பூர்வ கடிதத்தில் எங்கேயும் குறிப்பிடவில்லை’ - பெலிக்ஸ் ஜெரால்ட்.
விரிவான விளக்கம்
கடந்த செப்டம்பர் 27ம் தேதி கரூரில் நடைபெற்ற தவெக தலைவர் விஜய்-ன் பிரச்சார பயணக்கூட்டத்தில் ஏற்பட்ட கூட்ட நெரிசல் காரணமாக 41 பேர் உயிரிழந்தனர்.
இந்த கூட்ட நெரிசல் குறித்து சட்டமன்றத்தில் முதல்வர் மு.க.ஸ்டாலின் விளக்கமளித்து பேசிய போது, ’விஜய் 7 மணி நேரம் தாமதமாக வந்தது கூட்ட நெரிசல் ஏற்படுவதற்கு முக்கிய காரணமாக அமைந்தது’ என்று குறிப்பிட்டார். அதேபோல், பெண்கள் பாதுகாப்பு மற்றும் பாலின நீதிக் கூட்டியக்கத்தின் சார்பாக அமைக்கப்பட்ட உண்மை கண்டறியும் குழுவின் அறிக்கையிலும், பிரச்சார கூட்டத்திற்கு தவெக தலைவர் விஜய் மிக காலதாமதமாக வந்ததே முதன்மைக் காரணம் என்று தெரிவிக்கப்பட்டிருந்தது.
இந்நிலையில் ரெட் பிக்ஸ் யூடியூப் தளத்தில் பெலிக்ஸ் ஜெரால்ட் மற்றும் தமிழ்க்குமரன் ஆகிய இருவரும் கரூர் கூட்ட நெரிசல் குறித்து விவாதிப்பது போன்ற வீடியோ வெளியிடப்பட்டுள்ளது. அதில், ‘தவெக தலைவர் கரூர் சம்பவம் நடந்த அன்று நாமக்கல் நகரத்திற்கு காலை 8.45க்கும் கரூர் நகரத்திற்கு பகல் 12 மணிக்கு வருவார் என்று தவெக கட்சியின் அதிகாரப்பூர்வ கடிதத்தில் எங்கேயும் குறிப்பிடவில்லை. அந்த நேரம் நிகழ்ச்சி ஏற்பாட்டாளர்களுக்காக மட்டுமே குறிப்பிடப்பட்டதாகும். அந்த நேரத்தில் விஜய் மக்களை சந்திப்பார் என்று எங்கேயும் சொல்லப்படவில்லை. இதனால் விஜய் 7 ஏழு மணி நேரம் தாமதமாக வந்தது தான் கரூர் கூட்ட நெரிசலுக்கு காரணம் என்று சொல்லப்படவது உண்மை அல்ல’ என்று பேசியிருக்கிறார்கள்.
விஜய்யோட தாமதம் குறித்த குற்றச்சாட்டுகளுக்கு ஆதாரத்தோடு முற்று புள்ளி வைத்த Redpix!#KarurStampede #TVKVijay #felixgerald #RealTruthKarur #Vijay #ThalapathyVijay #KarurTragedy #TVKVijay
Full Video Link:-https://t.co/jfLdoBago5 pic.twitter.com/pw6SOHotkL
உண்மை என்ன?
பெலிக்ஸ் ஜெரால்ட் குறிப்பிடும் தவெகவின் அதிகாரப்பூர்வ அறிவிப்பை படித்துப் பார்த்தோம். அதில், ‘மக்கள் சந்திப்பு நிகழ்ச்சிகளுக்கான ஏற்பாட்டாளர் குழுக்கள் விவரம், இடம் மற்றும் நேரம்’ என்று தான் குறிப்பிடப்பிடப்பட்டிருக்கிறது.
அதாவது, மக்கள் சந்திப்பு நிகழ்ச்சியை ஏற்பாடு செய்யும் கட்சிக் குழுக்களின் விவரங்களும், நிகழ்ச்சி நடக்கும் நேரம், இடம் ஆகியவையும் தான் குறிப்பிடப்பட்டுள்ளது. அதில், நிகழ்ச்சி ஏற்பாட்டாளர் குழுக்கள் வரவேண்டிய நேரம் என்று தனியாக எதுவும் குறிப்பிடவில்லை.
தலைமை நிலையச் செயலக அறிவிப்பு
அனைவருக்கும் வணக்கம்.
மக்கள் விரும்பும் முதல்வர் வேட்பாளர், தமிழக வெற்றிக் கழகத் தலைவர் திரு. விஜய் அவர்களின் மக்கள் சந்திப்பு நிகழ்ச்சி, நாளை (27.09.2025) நாமக்கல் மற்றும் கரூர் மாவட்டங்களில் நடைபெற உள்ளது.
இந்த மக்கள் சந்திப்பு…
மேலும், தவெக கட்சியின் பொதுச் செயலாளர் புஸ்ஸி ஆனந்த் கடந்த செப்டம்பர் 26ஆம் தேதி ஊடகங்களிடம் பேசிய போது, ‘கரூர் வேலுச்சாமிபுரத்தில் தவெக தலைவர் விஜய் செப்டம்பர் 27ஆம் தேதி 12 மணியளவில் மக்களை சந்திக்கவிருப்பதாக’ தெரிவிக்கிறார்.
தவெக கட்சியின் இளைஞர் அணி (Tvk YouthWing) என்று பெயரிடப்பட்ட சமூக வலைத்தள பக்கத்திலும் இவ்வாறு நாமக்கலில் காலை 8.45 மணிக்கும் கரூரில் நண்பகல் 12 மணிக்கும் விஜய் மக்களை சந்திக்கவிருப்பதாக குறிப்பிடப்பட்டுள்ளது.
#JUSTIN | மக்கள் சந்திப்பு நிகழ்ச்சியை முன்கூட்டியே தொடங்க த.வெ.க. தலைவர் விஜய் திட்டம்; நாளை காலை 8:45 மணிக்கு நாமக்கலிலும், நண்பகல் 12:00 மணிக்கு கரூரிலும் பிரசாரம்!#TVKVijay | #TVK | #TVKCampaign | #DailyThanthi pic.twitter.com/Cg4RGzMJ6K
மேலும் ’தினத்தந்தி’ போன்ற முன்னணி செய்தி ஊடகங்கள் கூட நாமக்கலில் காலை 8.45 மணிக்கும் கரூரில் நண்பகல் 12 மணிக்கும் விஜய் மக்களை சந்திக்க திட்டமிட்டிருப்பதாக செப்டம்பர் 26ஆம் தேதி செய்தி வெளியிட்டுள்ளதைக் காணமுடிகிறது.
இதிலிருந்து கரூரில் பகல் 12 மணிக்கு விஜய் மக்களை சந்திக்கவிருப்பதாக தவெக தரப்பிலிருந்து அதிகாரப்பூர்வமாகவே அறிவிக்கப்பட்டிருப்பதை அறியமுடிகிறது.
முடிவு:
தவெக தலைவர் விஜய் செப்டம்பர் 27ஆம் தேதி பகல் 12 மணிக்கு கரூரில் மக்களை சந்திக்கயிருப்பதாக தவெக தரப்பிலே அதிகாரப்பூர்வமாக அறிவிக்கப்பட்டதற்கான தெளிவான ஆதாரங்கள் உள்ளது. இவ்வளவு தெளிவான ஆதாரங்கள் இருக்கும் நிலையிலும் அதனை மறைத்துவிட்டு ரெட் பிக்ஸ் யூட்யூப் தளத்தில் பெலிக்ஸ் ஜெரால்ட் பச்சையான பொய்யை பரப்பிவருகிறார்.
