சென்னை Air Show-வில் இறந்தவர்களுக்கு நிவாரணம் இன்னும் கொடுக்கப்படவில்லையா? உண்மை என்ன?

’முதல்வரும் துணை முதல்வரும் கலந்துகொண்ட சென்னை ஏர்ஷோவில் (Air Show) ஐந்து பேர் இறந்து போனார்கள். அந்த குடும்பத்திற்கு இன்னும் நிவாரண நிதி கொடுக்கப்படவில்லை’ - ராவ்தர் இப்ராகிம், தவெக

YouTube Link

2024 அக்டோபர் 6ஆம் தேதியன்று சென்னை மெரினா கடற்கரையில் இந்திய விமானப்படையின் 92ஆவது ஆண்டு விழாவைக் கொண்டாடும் வகையில் விமான சாகச நிகழ்ச்சி நடத்தப்பட்டது. அதில் கலந்துகொண்டவர்களில் 5 பேர் இறந்தனர். 300க்கு மேற்பட்டவர்கள் மருத்துவமனையில் அனுமதிக்கப்பட்டனர். 

இந்நிலையில் சமீபத்தில் ‘Citi Fox Media’ என்ற யூட்யூப் தளத்தில் நேர்காணலில் கலந்து தவெக கட்சியைச் சேர்ந்த ராவ்தர் இப்ராகிம், ’இந்த சென்னை விமான சாகச நிகழ்ச்சியைக் காண வந்து இறந்து போன 5 பேருக்கு இன்னும் நிவாரண நிதி வழங்கப்படவில்லை’ என்று பேசினார்.

உண்மை என்ன?

சென்னை விமான சாகச நிகழ்ச்சியில் இறந்து போனவர்களுக்கு நிவாரண நிதி ஏதும் கொடுக்கப்பட்டுள்ளதா என்று செய்திகளில் தேடினோம்.

‘The Hindu’ செய்தித்தளத்தில் வெளியான செய்தியின் படி, இந்த விமான சாகச நிகழ்ச்சி நடந்த மறுநாளே, ‘இறந்த ஐந்து பேரின் குடும்பங்களுக்கு ஆறுதல் தெரித்ததோடு, அவர்களுக்கு ரூபாய் 5 லட்சம் நிவாரணத் தொகை கொடுக்க முதல்வர் ஸ்டாலின் உத்தரவிட்டதாக தெரிகிறது.

இதேபோல், ‘இந்து தமிழ் திசை’ செய்தித்தளத்தில் வெளியான செய்தியைக் காணமுடிகிறது. ‘இந்த விமான சாகச நிகழ்ச்சியில் கடும் வெயில் மற்றும் பிற மருத்துவ காரணங்களால் 5 பேர் இறந்து போனதற்கு  மன வேதனை அடைந்தேன். அவர்களது குடும்பங்களுக்கு இரங்கல்  தெரிவித்துக் கொள்கிறேன். மேலும் அவர்களுக்கு முதல்வர் பொது நிவாரண நிதியில் இருந்து தலா 5 லட்சம் ரூபாய் வழங்க உத்தரவிட்டுள்ளேன்’ என்று ஸ்டாலின் தெரிவித்தாக அச்செய்தியில் குறிப்பிடப்பட்டுள்ளது. 

இதிலிருந்து சென்னை விமான சாகச நிகழ்ச்சியில் இறந்தவர்களின் குடும்பங்களுக்கு முதல்வர் பொது நிவாரண நிதியில் இருந்து 5 லட்சம் வழங்கப்பட்டுள்ளது தெளிவாகிறது.

முடிவு:

சென்னை விமான சாகச நிகழ்ச்சியில் இறந்து போன ஐந்து பேரின் குடும்பத்திற்கு இன்னும் நிவாரண நிதி கொடுக்கப்படவில்லை என்று தவெகவைச் சேர்ந்த ராவ்தர் இப்ராகிம் தவறான தகவலை பரப்பி வருகிறார்.