முன்னாள் குடியரசுத்தலைவர் அப்துல் கலாமின் மூத்த சகோதரர் என்று பரவும் தவறானப் புகைப்படம்!

Mind = Blown! Did you know this? 

Instagram Link | Archived Link

பரவி வரும் புகைப்படத்தில் இருப்பவர் தான் முன்னாள் குடியரசுத் தலைவர் அப்துல் கலாமின் மூத்த சகோதரர் முகமது முத்து மீரா லெப்பை மரைக்காயர் என்றும், 104 வயதாகும் அவர், இன்னும் குடை பழுதுபார்த்து தனது வருமானத்தை ஈட்டி வருவதாகவும் பதிவு ஒன்று வைரலாகி வருகிறது. 

உண்மை என்ன? 

பரவி வரும் இந்த புகைப்படம் குறித்து தேடி பார்த்தோம். அப்போது முன்னாள் இந்தியக் குடியரசுத் தலைவர் டாக்டர் ஏ.பி.ஜே.அப்துல் கலாம், ஷில்லாங்கில் உள்ள இந்திய மேலாண்மை நிறுவனத்தில் மாணவர்களிடையே பேசிக் கொண்டிருந்தபோது, ஜூலை 27, 2015 அன்று மாரடைப்பால் உயிரிழந்தார். 2015 முதலே இந்த புகைப்படம் அப்துல் கலாமின் சகோதரர் என்று பல்வேறு சமூகவலைதளப்பக்கத்தில் பரவி வந்ததை பார்க்கமுடிந்தது. 

இதையடுத்து அப்துல் கலாமின் சகோதரரின் தொழிலை குறித்து தேடி பார்த்தோம். அப்போது apj abdul kalam foundation-ன் இணையதளப்பக்கத்தில், முகமது முத்து மீரா லெப்பை மரைக்காயர் குறித்து சில தகவல்கள் கிடைத்தன. அவர் apj abdul kalam foundation-ன் முன்னாள் தலைவராகவும், அறங்காவலர்களில் ஒருவராக இருந்ததும் தெரியவந்தது. மேலும் அந்த இணையதளப்பக்கத்தில் உள்ள புகைப்படத்திற்கும், பரவி வரும் புகைப்படத்திற்கும் எந்த தொடர்புமில்லை என்பதையும் பார்க்கமுடிந்தது. 

மேலும் இதை உறுதி செய்ய, அப்துல் கலாமின் சகோதரர் குறித்து ஏதேனும் செய்தி வெளியிடப்பட்டுள்ளதா என்பது குறித்து தேடி பார்த்தோம்.அப்போது மார்ச் 07, 2021 அன்று Hindustan Times, The Hindu போன்ற ஊடகப் பக்கங்களில், வயது முதிர்வு காரணமாக அப்துல் கலாமின் சகோதரர் முகமது முத்து மீரான் 104 வயதில் காலமானார் என்று செய்தி வெளியாகியிருந்ததை பார்க்கமுடிந்தது.

முடிவு:

நம் தேடலில், அப்துல் கலாமின் மூத்த சகோதரர் என்றும், குடை பழுதுபார்க்கும் கடையில் இன்னும் வேலை செய்து வருகிறார் என்றும் பரவி வரும் பதிவு தவறானது என்பது தெரியவந்தது.