யூடர்ன் தீர்ப்பு
YouTurn Verdict
சரிபார்க்கப்பட்ட கூற்று
தந்தி டிவியின் உண்மையான நியூஸ் கார்டில் திருமாவளவன் வெள்ளை நிற ஆடை அணிந்திருந்த புகைப்படமே இடம்பெற்றுள்ளது. இதை எடிட் செய்து காவி உடை அணிந்தது போல் தவறாகப் பரப்புகின்றனர்.
பரவிய செய்தி
விரிவான விளக்கம்
பாதுகாப்புத்துறை தொடர்பான நாடாளுமன்ற நிலைக்குழுவினர் மே 31 அன்று திருப்பதி ஏழுமலையான் கோயிலுக்கு சென்று சாமி தரிசனம் செய்து வழிபட்டனர். பாதுகாப்புத்துறை தொடர்பான நாடாளுமன்ற நிலைக்குழுவில் எம்.பி திருமாவளவனும் இடம்பெற்றுள்ளார். அந்தவகையில், அந்த நிலைக்குழுவினரோடு சென்று ஆய்வுகளில் பங்கேற்றதோடு, திருப்பதி கோவிலிலும் தரிசனம் செய்தார்.
இந்நிலையில் திருமாவளவன் திருப்பதியில் காவி உடையில் சாமி தரிசனம் செய்ததாக தந்தி டிவி ஊடகத்தின் நியூஸ்கார்டு ஒன்று வைரலாகி வருகிறது.
முழுசாக சங்கியாக மாரி இருக்கும் சோபாவை பார் 😳🔥 pic.twitter.com/FNMKyrG6Qj
உண்மை என்ன?
பரவி வரும் நியூஸ் கார்ட் குறித்து தந்தி டிவி ஊடகத்தின் சமூகவலைதளப்பக்கங்களில் தேடிப் பார்த்தோம். அப்போது மே 31 அன்று “திருப்பதியில் விசிக தலைவர் திருமாவளவன் சாமி தரிசனம்” என்று தந்தி டிவி ஊடகத்தின் பேஸ்புக் பக்கத்தில் நியூஸ் கார்ட் வெளியாகியிருந்தது. அதில் திருமாவளவன் வெள்ளை நிற ஆடை அணிந்திருந்த புகைப்படமே இடம்பெற்றுள்ளது.
மேலும் பரவி வரும் நியூஸ் கார்டில் Gemini AI லோகோ இடம்பெற்றிருந்ததையும் பார்க்கமுடிந்தது. இந்நிலையில் உண்மையான நியூஸ் கார்டை எடிட் செய்து காவி உடை அணிந்தது போல் பரப்புவது உறுதியானது.
இதை மேலும் உறுதிப்படுத்த வேறு ஊடகங்களில் வெளியான செய்தியையும் தேடிப் பார்த்தோம். அப்போது News7 Tamil ஊடகத்திலும் வெளியான செய்தியிலும் திருப்பதியில் சாமி தரிசனம் செய்யும் போது திருமாவளவன் வெள்ளை நிற ஆடை அணிந்திருந்ததை பார்க்கமுடிந்தது.
முடிவு:
எனவே, தந்தி டிவியின் உண்மையான நியூஸ் கார்டில் திருமாவளவன் வெள்ளை நிற ஆடை அணிந்திருந்த புகைப்படமே இடம்பெற்றுள்ளது. இதை எடிட் செய்து காவி உடை அணிந்தது போல் தவறாகப் பரப்புகின்றனர்.
