’ஜனநாயகன்’ படத்தை கசியவிட்டதற்காக திமுகவினர் கைது என பரப்பப்படும் புகைப்படங்கள்! உண்மை என்ன?

#Breaking DMK ITwing functionaries arrested for #JanaNayagan leak.

Link / Archive Link

இந்த ஆண்டு ஜனவரி மாதம் வெளியாக வேண்டிய விஜய் நடித்த ‘ஜனநாயகன்’ திரைப்படம் சென்சார் பிரச்சினை காரணமாக வெளியாகாமல் தள்ளி வைக்கப்பட்டது. இந்நிலையில் கடந்த மார்ச் மாதம் மறு தணிக்கை குழு ’ஜனநாயகன்’ படத்தை பார்வையிடயிருப்பதாக செய்திகள் வெளியாகின. இதனால் படம் விரைவில் வெளியாகும் என்ற ரசிகர்கள் எதிர்பார்த்திருந்த நிலையில், முழுப் படமும் இணையத்தில் கசிந்தது. 

இந்நிலையில் ‘ஜனநாயகன்’ படத்தை சட்டவிரோதமாக இணையத்தில் கசியவிட்டது திமுக தகவல் தொழில்நுட்ப அணியினர் (IT Wing) தான் என்றும், அவர்கள் போலீஸாரால் கைது செய்யப்பட்டிருப்பதாகவும் புகைப்படங்கள் சமூக வலைத்தளத்தில் தவெக ஆதரவாளரால் பரப்பப்படுகிறது.

🚨 #Breaking DMK ITwing functionaries arrested for #JanaNayagan leak. pic.twitter.com/CArWGRGze1

— S D Raja - Returns (@raja_sd22122) April 11, 2026

உண்மை என்ன?

பரப்பப்படும் இரண்டு புகைப்படங்களையும் ’Reverse Image Search’ முறையில் இணையத்தில் தேடிய போது, ’இந்து தமிழ் திசை’ செய்தித்தளத்தில் ஒரு செய்தியைக் காணமுடிந்தது.

அண்ணா பல்கலைக்கழகத்தில் மாணவி ஒருவரை பாலியல் வன்கொடுமை செய்த வழக்கில் குற்றவாளியான ஞானசேகரனுக்கு ஆயுள் தண்டனை விதிக்கப்பட்டிருப்பதாக வெளியான இந்த செய்தியில் பரப்பப்படும் முதல் புகைப்படத்தைக் காணமுடிகிறது. ஆனால் உண்மையான புகைப்படத்தில் இருக்கும் சட்டையின் நிறத்தை Edit செய்து மாற்றியிருக்கிறார்கள் என்பதைக் காணமுடிகிறது. 

அடுத்ததாக, ‘The News Minute’ ஆங்கில செய்தித்தளத்தில் 2019 டிசம்பர் மாதம் கோவையில் சிறுமியை பாலியல் வன்கொடுமை செய்து கொலை செய்த குற்றத்திற்காக குற்றவாளிக்கு மரண தண்டனை விதிக்கப்பட்டது குறித்து வெளியான செய்தி ஒன்றில், இரண்டாவது புகைப்படத்தைக் காணமுடிகிறது. இந்த புகைப்படத்தில் குற்றவாளி கைக்குட்டையால் முகத்தை முழுவதுமாக மூடியிருப்பதைக் காண்கிறோம். இதனை Edit செய்து முகம் தெரிவது போன்றும், சட்டையின் நிறத்தையும் மாற்றி போலியான புகைப்படத்தை உருவாக்கியிருக்கிறார்கள். 

மேலும் ஏப்ரல் 12ஆம் தேதி வெளியான செய்தியின் படி, ‘ஜனநாயகன்’ படத்தை கசியவிட்டதற்காக 6 பேரை சைபர் கிரைம் போலிஸார் கைது செய்திருப்பதாக தெரிகிறது. ஆனால் கைது செய்யப்பட்டவர்கள் படத்தை முதன் முதலாக கசியவிட்டவர்களா? அல்லது பகிர்ந்தவர்களா? என்ற தகவல்கள் இன்னும் வெளியிடப்படவில்லை. மேலும் கைது செய்யப்பட்டவர்களின் புகைப்படங்களும் வெளியிடப்படவில்லை. 

இவ்வாறு பரப்பப்படும் இந்த புகைப்படங்கள் இரண்டும் Edit செய்து போலியாக உருவாக்கப்பட்டவை என்பது தெரிகிறது.

முடிவு:

Edit செய்து போலியாக உருவாக்கப்பட்ட புகைப்படங்களைக் கொண்டு, ‘ஜனநாயகன்’ திரைப்படத்தை இணையத்தில் கசியவிட்ட திமுக இணைய அணியினர் கைது என்று தவறான தகவலை பரப்புகிறார்கள்.