யூடர்ன் தீர்ப்பு
YouTurn Verdict
சரிபார்க்கப்பட்ட கூற்று
வீடியோவின் ஒரு பகுதியை மட்டும் வெட்டி (Edit) தவறாகப் பரப்புகின்றனர்.
பரவிய செய்தி
விரிவான விளக்கம்
ஃபெங்கல் புயலினால் தமிழ்நாட்டின் வட மாவட்டங்கள் மிகுந்த சேதத்திற்கு உள்ளாகி மக்கள் அவதிப்பட்டனர். இந்நிலையில் கடலூர் மாவட்டத்துக்குட்பட்ட கண்டக்காடு, விழுப்புரம் மாவட்டத்துக்குட்பட்ட தேவனூா் கிராமங்களில் பாமக சார்பில் இலவச மருத்துவ முகாம்கள் ஞாயிற்றுக்கிழமை நடைபெற்றன.
மாங்கா மணி நீ டாகடருக்கு தான் படிச்சியா 🤦♂️🤦♂️ pic.twitter.com/OBn37tcHft
அக்கட்சியின் தலைவர் அன்புமணி ராமதாஸ் மக்களுக்குச் சிகிச்சை அளித்து நிகழ்ச்சியைத் தொடங்கி வைத்தார். அப்போது ஸ்டெதஸ்கோப்பை (Stethoscope) காதில் மாட்டாமலேயே அன்புமணி பரிசோதனை செய்ததாக வீடியோ மற்றும் புகைப்படம் சமூக வலைத்தளத்தில் பரப்பப்படுகிறது.
சின்னய்யா கொஞ்சம் காதுல வைங்க அய்யா👍🏻 pic.twitter.com/hugFvhsmez
உண்மை என்ன?
பரவக் கூடிய புகைப்படம் மற்றும் வீடியோவில் ‘மின்னம்பலம்’ ஊடகத்தின் லோகோ இருப்பதைக் காண முடிகிறது. இதனைக் கொண்டு அவர்களது யூடியூப் பக்கத்தில் ஆய்வு செய்தோம்.
பாமக சார்பில் நடத்தப்பட்ட மருத்துவ முகாமை அன்புமணி தொடங்கி வைத்த வீடியோ நேற்றைய தினம் (டிச.8) மின்னம்பலம் யூடியூப் பக்கத்தில் பதிவிடப்பட்டுள்ளது. அன்புமணி நிகழ்ச்சியை தொடங்கி வைப்பது, மக்களை மருத்துவ பரிசோதனை செய்வது, செய்தியாளர்களைச் சந்திப்பது என சுமார் 37 நிமிடம் கொண்ட அவ்வீடியோவின் கடைசியில் (35:40) பரவக் கூடிய வீடியோ தொடர்பான காட்சியைக் காண முடிகிறது.
முகாமிலிருந்த மருத்துவர் ஒருவர் சிறுவன் ஒருவனுக்கு ஸ்டெதஸ்கோப் மூலம் பரிசோதனை செய்யச் சொல்லி அன்புமணியிடம் அழைத்து வருகிறார். முகாம் நடைபெறும் இடத்திலிருந்து கிளம்புவதற்காக எழுந்த அன்புமணி அச்சிறுவனின் இதயத் துடிப்பைப் பரிசோதிக்கிறார்.
பரிசோதனையின் போது ஸ்டெதஸ்கோப்பை காதில் மாட்டாமல் இருந்ததை உணர்ந்த அன்புமணி, பிறகு காதில் மாட்டி சிறுவனைப் பரிசோதனை செய்வதை வீடியோவில் காண முடிகிறது. மேலும் சிறுவனுக்குப் பரிசோதனை செய்வதற்கு முன்னர் 3 பேருக்குப் பரிசோதனை செய்தார். அப்போது ஸ்டெதஸ்கோப்பை சரியாக காதில்தான் மாட்டியுள்ளார்.
மேற்கண்ட நிகழ்வின் போது எடுக்கப்பட்ட வீடியோவின் ஒரு பகுதியை மட்டும் வெட்டி (Edit) அன்புமணி ஸ்டெதஸ்கோப்பை காதில் மாட்டாமல் பரிசோதனை செய்ததாகத் தவறாகப் பரப்புகின்றனர்.
முடிவு:
ஸ்டெதஸ்கோப்பை காதில் மாட்டாமல் அன்புமணி பரிசோதனை செய்ததாகப் பரவும் வீடியோ குறித்த தகவல் தவறானது. ஸ்டெதஸ்கோப்பை காதில் மாட்டாமல் இருந்ததை உணர்ந்த அன்புமணி, பிறகு காதில் மாட்டி சிறுவனைப் பரிசோதனை செய்துள்ளார். வீடியோவின் ஒரு பகுதியை மட்டும் வெட்டி (Edit) தவறாகப் பரப்புகின்றனர்.
