யூடர்ன் தீர்ப்பு
YouTurn Verdict
சரிபார்க்கப்பட்ட கூற்று
தமிழ்நாடு பாஜகவின் முன்னாள் தலைவர் அண்ணாமலை குறித்த பழைய கேலி சித்திரப்படத்தை Edit செய்து போலியாக உருவாக்கப்பட்ட படம் இது.
பரவிய செய்தி
திமுக கொத்தடிமைகளா!!!
ஜூனியர் விகடனுக்கு பிப்ரவரி மாத சம்பளத்தை ஒழுங்கா போட சொல்லுங்கடா ..
வச்சு சிதைச்சி இருக்கான் விகடன்
விரிவான விளக்கம்
ஜூனியர் விகடன் இதழ் ஒன்றின் அட்டைப்படத்தில், முதல்வர் ஸ்டாலின் ஆகாயத்திலிருந்து விழுவது போன்றும் அருகில் காற்று போன பலூன் ஒன்றும் பறப்பது போன்றும் ஒரு கேலிச் சித்திரப்படம் இடம்பெற்றிருக்கிறது. அதாவது ஸ்டாலின் பற்றி ஊதி பெருக்கப்பட்ட பிம்பம் உடைந்துவிட்டதாக பொருள்படும் இந்த அட்டைபடத்தை சமீபத்தில் ஜூனியர் விகடன் வெளியிட்டுள்ளதாக பாஜக ஆதரவாளர்களால் சமூக வலைத்தளத்தில் பரப்பப்படுகிறது.
திமுக கொத்தடிமைகளா!!!
ஜூனியர் விகடனுக்கு பிப்ரவரி மாத சம்பளத்தை ஒழுங்கா போட சொல்லுங்கடா ..
வச்சு சிதைச்சி இருக்கான் விகடன் 🤣🤣 pic.twitter.com/HHBXSG0dyX
உண்மை என்ன?
பரப்பப்படும் இந்த அட்டைப்படத்தில் 07/09/2022 என்று தேதி குறிப்பிடப்பட்டிருப்பதைக் காண்கிறோம். மேலும் அதில் ’Volume 40 Issue 72’ என்று குறிப்பிடப்பட்டிருப்பதையும் காண்கிறோம்.
நாளைய ஜூனியர் விகடனில்!#Annamalai #Bjp pic.twitter.com/xbTIJXg1ow
இதனை அடிப்படையாக கொண்டு ஜூனியர் விகடன் பழைய இதழ்களை தேடியபோது, ஜூனியர் விகடன் இதழின் அதிகாரப்பூர்வ ‘எக்ஸ்’ தளத்தில் 2022ஆம் ஆண்டு செப்டம்பர் மாதம் வெளியிடப்பட்டுள்ள அட்டைப்படத்தை காணமுடிகிறது. அதில் மேற்குறிப்பிடப்பட்டுள்ள தேதி, இதழ் எண் (Volume 40 Issue 72) எல்லாம் ஒன்றாகவே இருப்பதைக் காண்கிறோம்.
ஆனால் அந்த அட்டைப்படத்தில் தமிழ்நாடு பாஜகவின் முன்னாள் தலைவர் அண்ணாமலை குறித்த கேலி சித்திரப்படம் தான் இடம்பெற்றிருக்கிறது. மேலும் அதில் ஜூனியர் விகடன் அண்ணமைலையை 'Tag' செய்திருப்பதையும் காணமுடிகிறது. இவ்வாறு அண்ணாமலை குறித்து ஜுனியர் விகடன் வெளியிட்டிருந்த பழைய கேலி சித்திரத்தை போலியாக Edit செய்து ஸ்டாலின் பற்றி சமீபத்தில் வெளியிடப்பட்ட கேலி சித்திரம் போல் மாற்றியுள்ளனர்.
முடிவு:
தமிழ்நாடு பாஜகவின் முன்னாள் தலைவர் அண்ணாமலை குறித்து ஜுனியர் விகடன் வெளியிட்டிருந்த பழைய அட்டைப்பட கேலி சித்திரத்தை போலியாக Edit செய்து, சமீபத்தில் ஸ்டாலின் குறித்து ஜுனியர் விகடன் அட்டைப்படம் வெளியிட்டதாக தவறாக பரப்பிவருகிறார்கள்.
