யூடர்ன் தீர்ப்பு
YouTurn Verdict
சரிபார்க்கப்பட்ட கூற்று
சிதம்பரம் நடராஜர் கோவிலில் தீட்சிதர்கள் கிரிக்கெட் விளையாடிய வீடியோ என்று பரவும் தகவல் தவறானது.
பரவிய செய்தி
தீட்சிதர் அணி
எம். ஏ. சிதம்பரம் ஸ்டேடியம் அல்ல.
சிதம்பரம் கோவிலே ஸ்டேடியமாக மாறியது.
சிவன் மேல பந்து பட்டா சிக்ஸ்.
விரிவான விளக்கம்
சிதம்பரம் கோவில் வளாகத்தில் தீட்சிதர்கள் கிரிக்கெட் விளையாடியதை வீடியோ எடுத்த விசிக நிர்வாகி மீது தீட்சிதர்கள் தாக்குதல் நடத்தியதாகச் செய்திகள் சில நாட்களுக்கு முன்பு வெளியான நிலையில், சிதம்பரம் நடராஜர் கோவிலுக்குள் தீட்சிதர்கள் கிரிக்கெட் விளையாடினர் என்றுக் கூறி 0:24 வினாடிகள் கொண்ட ஒரு வீடியோ சமூக ஊடகங்களில் பகிரப்பட்டு வருகிறது.
உண்மை என்ன ?
பரவி வரும் வீடியோ குறித்து ஆய்வு செய்து பார்த்ததில், காஞ்சிபுரம் கோவிலில் வெங்கடேஷ் ஐயர் கிரிக்கெட் விளையாடினார் எனக் கூறி Gyani asad என்ற யூடியூப் பக்கத்தில் பரவக்கூடிய வீடியோ இருப்பதை காணமுடிந்தது. இந்த வீடியோ ஜுன் 06, 2023 அன்று வெளியிடப்பட்டிருந்தது.
மேலும் தேடுகையில், கிரிக்கெட் வீரர் வெங்கடேஷ் ஐயர் காஞ்சிபுரத்திலிருக்கும் சந்திரசேகரேந்திர சுவாமி மணிமண்டபத்துக்கு வந்ததாகவும், அப்போது அங்கு பாட சாலையில் படிக்கும் மாணவர்கள் அவரை கிரிக்கெட் விளையாட அழைத்ததாகவும், அவர்களுடன் இவர் கிரிக்கெட் விளையாடியதாகவும் இந்தியா டுடே வெளியிட்டிருந்த செய்தியின் மூலம் அறியமுடிந்தது. இந்த செய்தி ஜூன் 8,2023 அன்று பதிவிடப்பட்டுள்ளது.
தொடர்ந்து தேடுகையில், வெங்கடேஷ் ஐயர் அவரது இன்ஸ்டாகிராம் பக்கத்தில் வைரலாகும் வீடியோவை ஜூன் 05, 2023 அன்று பகிர்ந்திருப்பதை காணமுடிந்தது. அப்பதிவில் காஞ்சிபுரத்தில் உள்ள இளம் வேத பாடசாலை மாணவர்களுடன் கிரிக்கெட் விளையாடியது மகிழ்ச்சியளிக்கிறது எனக் குறிப்பிட்டிருந்தார்.
இவற்றிலிருந்து, வைரலாகும் வீடியோவுக்கும், சிதம்பரத்தில் நடந்த சம்பவத்துக்கும் எந்தவொரு சம்பந்தமும் இல்லை என்பது தெளிவாகிறது.
முடிவு :
நம் தேடலில், சிதம்பரம் நடராஜர் கோவிலில் தீட்சிதர்கள் கிரிக்கெட் விளையாடிய வீடியோ என்று பரவும் தகவல் தவறானது. அவ்வீடியோ சென்ற வருடம் ஜூன் மாதத்தில் காஞ்சிபுரம் சந்திரசேகரேந்திர சுவாமி மணிமண்டப வளாகத்தில் வெங்கடேஷ் ஐயர் பாட சாலையில் படிக்கும் மாணவர்களுடன் கிரிக்கெட் விளையாடியபோது எடுக்கப்பட்டது என்பதே உண்மையான தகவல்.
