யூடர்ன் தீர்ப்பு
YouTurn Verdict
சரிபார்க்கப்பட்ட கூற்று
இது திட்டமிட்டு எடுக்கப்பட்ட ஸ்கிரிப்டட் வீடியோ. உண்மையில் நடந்த சம்பவம் கிடையாது.
பரவிய செய்தி
ஹிந்து சொந்தங்களுக்கான எச்சரிக்கைப் பதிவு. வெளிநாட்டில் வேலை என ஏமாற்றி ஹிந்து பெண்களை அரபு நாடுகளில் விற்கப்படுவதை தடுத்த ஒரு ஹிந்து இளைஞர்.
விரிவான விளக்கம்
வெளிநாட்டில் வேலை எனக் கூறி அழைத்துச் செல்லப்படும் இந்து பெண்கள் அரபு நாடுகளில் விற்கப்படுவதாகவும், இதனை ஒரு இந்து இளைஞர் தடுத்து நிறுத்தியதாகவும் வீடியோ ஒன்று பரப்பப்படுகிறது. அந்த வீடியோவில், ஒரு பெண்மணியும் இளைஞரும் வீட்டில் அடைத்து வைக்கப்பட்டு இருந்த பெண்களை மீட்பதைக் காண முடிகிறது.
ஹிந்து சொந்தங்களுக்கான எச்சரிக்கைப் பதிவு‼️
வெளிநாட்டில் வேலை என ஏமாற்றி ஹிந்து பெண்களை அரபு நாடுகளில் விற்கப்படுவதை தடுத்த ஒரு ஹிந்து இளைஞர்.🚩 pic.twitter.com/MBdoaElKEd
உண்மை என்ன?
இந்து பெண்களை அரபு நாடுகளுக்குக் கடத்த இருந்தது தடுத்து நிறுத்தப்பட்டதாகப் பரவும் வீடியோவின், 11வது வினாடியில் disclaimer காட்டப்படுகிறது. அதில், ’இது பொழுதுபோக்கிற்காக எடுக்கப்பட்டது’ எனக் குறிப்பிடப்பட்டுள்ளது.
மேற்கொண்டு இவ்வீடியோ குறித்துத் தேடியதில், 2023, பிப்ரவரி 12ம் தேதி இதன் முழு வீடியோ ’Naveen Jangra’ என்ற யூடியூப் பக்கத்தில் பதிவிடப்பட்டு இருந்ததைக் காண முடிந்தது.
அப்பக்கத்தில் இது போன்று பல திட்டமிட்டு எடுக்கப்பட்ட scripted வீடியோக்கள் உள்ளன. பரவக் கூடிய வீடியோவில் பெண்களை மீட்கும் இளைஞரை மற்ற வீடியோக்களிலும் காண நேர்கிறது.
பொழுதுபோக்கு என்கிற பெயரில் இப்படிப் பல வீடியோக்கள் சமூக வலைத்தளத்தில் உள்ளன. இவை அனைத்தும் மதம் தொடர்பான பொய் செய்தி பரப்பப் பயன்படுத்தப்படுகிறது. இந்த வீடியோவும் இந்து பெண்கள் கடத்தப்படுகிறார்கள் என்ற பொய் செய்தி மட்டுமின்றி, முஸ்லிம்களைக் குறிக்கும் வகையில் அரபு நாட்டிற்குக் கடத்துகின்றனர் என மத ரீதியில் பிரிவினையைத் தூண்டும் விதத்தில் வதந்தி பரப்புகின்றனர்.
முடிவு:
அரபு நாட்டிற்குக் கடத்த இருந்த இந்து பெண்களை இளைஞர் ஒருவர் மீட்டதாகப் பரவும் வீடியோ உண்மையில் நடந்த சம்பவம் கிடையாது. அது திட்டமிட்டு எடுக்கப்பட்ட scripted வீடியோ.
