யூடர்ன் தீர்ப்பு
YouTurn Verdict
சரிபார்க்கப்பட்ட கூற்று
இந்த வீடியோவில் இருப்பது, புக்கரெஸ்ட் நகரத்தில் நடந்த விமான சாகச நிகழ்ச்சியின்போது ருமேனியா நாட்டுக்கொடியின் வண்ணங்கள் உமிழ்ந்து சாகசம் செய்யும் விமானம்.
பரவிய செய்தி
இவனுங்க வேற சாகசம் சொல்லிட்டு பாமக கட்சி கொடியை பறக்க விடறாங்க. அதுவும் திராவிட முதலமைச்சர் முன்னால்.
விரிவான விளக்கம்
இந்திய விமானப் படையின் 92ஆவது நிறுவன ஆண்டை கொண்டாடும் வகையில் சென்னை மெரினா கடற்கரையில் கடந்த அக்டோபர் 6ஆம் தேதி விமான சாகச நிகழ்ச்சி நடைபெற்றது. அதில் 72 விமானங்கள் வானில் பறந்து, வண்ணப்புகைகளை உமிழ்ந்து பல்வேறு சாகசங்களை நிகழ்த்தியது. இதனைக்காண தமிழ்நாடு முதல்வர் மு.க.ஸ்டாலினும் வந்திருந்தார். இதற்கிடையில், இந்த விமான சாகச நிகழ்ச்சியில் முதல்வரின் முன்னிலையில் பாமக கொடியின் வண்ணங்களை உமிழ்ந்து சாகசம் செய்யப்பட்டதாக எக்ஸ் தளத்தில் ஒரு வீடியோ பரப்பப்பட்டது.
உண்மை என்ன?
பரப்பப்பட்ட வீடியோவின் Keyframe-களைக் கொண்டு தேடுகையில் ’Shutter Stock’ என்னும் புகைப்படத் தளத்தில் வீடியோவுடன் ஒத்துப்போகும் புகைப்படம் ஒன்று இருப்பதைக் கண்டோம். அதன்கீழ் ’ருமேனியாவில் புக்கரெஸ்ட் என்னும் நகரத்தில் நடந்த விமான சாகச நிகழ்ச்சி’ என்று பதிவிடப்பட்டிருந்தது.
இந்த விவரங்களைக் கொண்டு இணையத்தில் மேலும் தேடுகையில், புக்கரெஸ்ட் நகரத்தில் நடந்த விமான சாகச நிகழ்ச்சியின் வீடியோ ’FotostefanRo’ என்னும் யூட்யூப் தளத்தில் இருந்தது. 17.27 நிமிடங்கள் நீளமுள்ள அந்த வீடியோவில் 15.27 ஆவது நிமிடம் பரப்பப்பட்ட வீடியோ துணுக்கில் நாம் கண்ட அதே காட்சி இடம் பெற்றிருப்பதை பார்த்தோம்.
இதிலிருந்து இந்த வீடியோ ருமேனியா நாட்டின் புக்கரெஸ்ட் நகரத்தில் நடந்த விமான சாகச நிகழ்ச்சியின்போது எடுக்கப்பட்டது என்பது தெளிவாகிறது.
முடிவு:
ருமேனியா நாட்டின் புக்கரெஸ்ட் நகரத்தில் நடந்த விமான சாகச நிகழ்ச்சியின் போது எடுக்கப்பட்ட வீடியோ துணுக்கு, சென்னையில் நடந்த விமான சாசக நிகழ்ச்சியின்போது பாமக கொடி பறக்கவிடப்பட்டதாக தவறாக பரப்பப்படுகிறது. இந்த வீடியோவில் இருப்பது ருமேனியா நாட்டின் கொடி, பாமக கொடி அல்ல.
