தெலுங்கு புத்தாண்டிற்கு தமிழ்நாட்டில் இந்தாண்டு தான் புதிதாக விடுமுறை அளிக்கப்பட்டிருக்கிறதா?

தெலுங்கு வருடப்பிறப்புக்கு எதுக்கு தமிழ்நாட்டில் லீவு??

Link / Archive Link

ஒவ்வொரு ஆண்டின் இறுதியிலும் வரவிருக்கின்றன புதிய ஆண்டுக்கான பொது விடுமுறை தினங்களுக்கான அறிவிப்பை தமிழ்நாடு அரசு வெளியிடும். அந்த வகையில் 2026ஆம் ஆண்டுக்கான பொது விடுமுறை தினங்களின் பட்டியல் மாநில அரசின் உள்துறைத் துறை சார்பில் நவம்பர் 11ஆம் தேதியன்று வெளியிடப்பட்டது.

அதில், மார்ச் 19ஆம் நாள் தெலுங்கு புத்தாண்டு தினத்திற்காக பொது விடுமுறையாக அறிவிக்கப்பட்டிருப்பதை சுட்டிக்காட்டி, ’தெலுங்கு வருட பிறப்பிற்கு தமிழ்நாட்டில் ஏன் புதிதாக விடுமுறை அறிவிக்கப்பட்டிருக்கிறது’ என்று சமூக வலைத்தளத்தில் பரப்பப்படுகிறது.

தெலுங்கு வருடப்பிறப்புக்கு எதுக்கு தமிழ்நாட்டில் லீவு?? pic.twitter.com/5cAIWsfmZ8

— priya (@PriyankaSmile01) November 11, 2025

உண்மை என்ன?

‘தெலுங்கு புத்தாண்டு தினத்திற்கு’ இதற்கு முந்தைய ஆண்டுகளில் விடுமுறை அறிவிக்கப்பட்டிருக்கிறதா? என்பது குறித்து தேடினோம். கடந்த 2023ஆம் ஆண்டிற்கான பொது விடுமுறை குறித்து தமிழ்நாடு அரசு 11/10/2022 அன்று வெளியிட்ட அதிகாரப்பூர்வ அறிவிப்பை காணமுடிந்தது. அதில், 22/03/2023 அன்று ‘தெலுங்கு புத்தாண்டு தினத்திற்கு’ பொது விடுமுறை அறிவிக்கப்பட்டிருப்பதைக் காண்கிறோம்.

இதேபோல், அதிமுக ஆட்சியில் இருந்தபோது வெளியிடப்பட்ட பொது விடுமுறை அறிவிப்புகளையும் தேடினோம். கடந்த 2020ஆம் ஆண்டிற்கான பொது விடுமுறை குறித்து தமிழ்நாடு அரசு 22/10/2019 அன்று வெளியிட்ட அதிகாரப்பூர்வ அறிவிப்பில் 25/03/2020 அன்று ‘தெலுங்கு புத்தாண்டு தினத்திற்கு’ பொது விடுமுறை அறிவிக்கப்பட்டிருப்பதைக் காண்கிறோம்.

இதேபோல், கடந்த 2021ஆம் ஆண்டிற்கான பொது விடுமுறை குறித்து தமிழ்நாடு அரசு 27/10/2020 அன்று வெளியிட்ட அதிகாரப்பூர்வ அறிவிப்பில், 13/04/2021 அன்று ‘தெலுங்கு புத்தாண்டு தினத்திற்கு’ பொது விடுமுறை அறிவிக்கப்பட்டிருப்பதைக் காண்கிறோம். 

இதிலிருந்து, தெலுங்கு புத்தாண்டிற்கு தமிழ்நாட்டில் பொது விடுமுறை அளிக்கப்படுவது வழக்கமான நடைமுறைதான் என்பது தெளிவாக தெரிகிறது.

முடிவு:

தெலுங்கு  புத்தாண்டிற்கு தமிழ்நாட்டில் இந்தாண்டுதான் புதிதாக விடுமுறை அளிக்கப்படுள்ளதாக தவறாக பரப்பி வருகிறார்கள்.