கேலோ இந்தியா துவக்க விழாவில் பிரதமருக்கு கிருஷ்ணன் சிலை வழங்கிய ஸ்டாலின் எனப் பரவும் தவறான தகவல்!

திமுகவின் பகுத்தறிவு பகவான் ஸ்ரீ கிருஷ்ணரிடம் பணிந்தது...

Twitter Link | Archive Link

13-வது கேலோ இந்தியா போட்டிகள் ஜனவரி 19-ல் தொடங்கி வருகின்ற 31-ம் தேதி வரை சென்னை, கோவை, மதுரை மற்றும் திருச்சியில் நடைபெறவுள்ளது. இந்நிலையில் இதற்கான தொடக்கவிழா நேற்று (ஜனவரி 19) சென்னை நேரு உள்விளையாட்டு அரங்கில் நடைபெற்றது. இந்நிகழ்ச்சியில் சிறப்பு விருந்தினராக பிரதமர் நரேந்திர மோடியுடன் சேர்த்து, ஆளுநர் ஆர்.என்.ரவி, ஒன்றிய இளைஞர் நலத்துறை அமைச்சர் அனுராக் சிங் தாக்கூர் உட்பட பலரும் கலந்து கொண்டனர்.

இந்நிலையில் கேலோ இந்தியா போட்டிக்கான துவக்க விழாவில் கலந்து கொண்ட பிரதமர் நரேந்திர மோடிக்கு நினைவுப் பரிசாக கிருஷ்ணன் சிலையை, முதலமைச்சர் மு.க.ஸ்டாலின் வழங்கியதாகக் கூறி வீடியோ ஒன்று சமூக ஊடகங்களில் வைரலாகப் பரவி வருகிறது.

ராமசாமி நாயக்கர், கருணாநிதி வரிசையில் கிருஷ்ணன்..
எல்லாம் ஒரே கேரக்டர் தான் அதனால் அன்பளிப்பாக கொடுத்தோம் என சொன்னாலும் ஆச்சரியமில்லை!!

திமுக இன்றோடு சனாதன ஒழிப்புக்கு முற்று புள்ளி வைத்தது.?? https://t.co/apJA1sYuH2

— அபிராமி (@Eelanayagi) January 19, 2024

உண்மை என்ன ?

பரவி வரும் செய்திகள் குறித்து ஆய்வு செய்ததில், கேலோ இந்தியா விளையாட்டுப் போட்டியின் சின்னமாக (mascot) வீரமங்கை வேலு நாச்சியார் உருவம் அறிவிக்கப்பட்டுள்ளதை Sports Tamilnadu யூடியூப் பக்கத்தில் வெளியிடப்பட்டுள்ள வீடியோ மூலம் உறுதி செய்ய முடிந்தது.



இது குறித்து மேலும் தேடியதில், கேலோ இந்தியா துவக்க விழாவில் கலந்து கொண்ட பிரதமர் நரேந்திர மோடிக்கு நினைவு பரிசு வழங்கிய போது எடுக்கப்பட்ட புகைப்படம், officialkheloindia மற்றும் sportstn_ இன்ஸ்டாகிராம் பக்கங்களில் வெளியிடப்பட்டிருந்ததை அறிய முடிந்தது. அதில், பிரதமருக்கு மு.க.ஸ்டாலின் வேலுநாச்சியாரின் சிலையையே நினைவுப் பரிசாக வழங்குகிறார்.

 

 

View this post on Instagram

 

A post shared by Sports Tamil Nadu (@sportstn_)

கார்டூன் வடிவில் உள்ள வேலுநாச்சியாரின் சிலையை, சிலர் தவறாக கிருஷ்ணரின் சிலை என்று கூறி சமூக ஊடகங்களில் வைரலாகப் பரப்பி வருகின்றனர்.

மேலும் படிக்க: காஷ்மீரின் லால் சவுக்கில் ராமர் படம் காட்சிப்படுத்தப்பட்டதாகப் பரவும் தவறான தகவல்!

மேலும் படிக்க: ராமர் கோயில் கும்பாபிஷேகத்திற்கு சென்ற பட்டாசு டிரக் தீ பிடித்ததாக ஊடகங்கள் வெளியிட்ட தவறான செய்தி!

முடிவு:

நம் தேடலில், கேலோ இந்தியா துவக்கவிழாவில் பிரதமருக்கு கிருஷ்ணன் சிலை வழங்கிய ஸ்டாலின் எனப் பரவும் செய்திகள் தவறானவை என்பதை அறிய முடிகிறது. அது கிருஷ்ணன் சிலை அல்ல, கேலோ இந்தியா விளையாட்டுப் போட்டியின் சின்னமாக (mascot) அறிவிக்கப்பட்ட வேலு நாச்சியார் சிலையே பிரதமருக்கு வழங்கப்பட்டது.