புகார் கொடுக்க வந்தவரை தாக்கிய காவல்துறை அதிகாரி எனப் பரவும் பழைய வீடியோ!

புகார் கொடுக்க வந்தவரை கொடூரமாக தாக்கிய காவல்துறை அதிகாரி

X Link | Archive Link

புகார் கொடுக்க வந்தவரை தாக்கிய காவல்துறை அதிகாரி என்று கூறி 29 வினாடிகள் கொண்ட வீடியோ ஒன்று சமூக ஊடகங்களில் வைரலாகப் பரவி வருகிறது, வீடியோவில் காவல்துறை அதிகாரி ஒருவர் புகார் கொடுக்க வந்த ஒருவரிடம் கடுமையாக பேசி, அவரை அறைவதையும் காண முடிகிறது. 

X Link

உண்மை என்ன? 

பரவி வரும் வீடியோவின் கீபிரேம்களை கூகுள் ரிவர்ஸ் இமேஜ் செர்ச் மூலம் தேடிப் பார்த்ததில், கடந்த 2019-ல் இருந்தே சமூக ஊடகங்களில் இந்த வீடியோ பரவி வந்துள்ளது என்பதை அறிய முடிந்தது. 

“Saree Collections” யூடியூப் பக்கத்தில், பரவி வரும் வீடியோ கடந்த 2019 ஜூன் 24 அன்று “அப்பாவி ஒருவரை அடிக்கும் தமிழ்நாடு காவல்துறை அதிகாரி“ என்று குறிப்பிட்டு பதிவு செய்யப்பட்டிருந்தது. 

இது குறித்து மேலும் தேடியதில், “Times of India “ ஊடகத்தின் பக்கத்தில் பரவி வரும் வீடியோவின் காட்சிகளைக் குறிப்பிட்டு கடந்த 2019-ல் செய்தி வெளியிடப்பட்டிருந்தது. அதில், “சின்னசேலத்தில் லாரி ஓட்டுநரை திட்டி, அறைந்ததற்காக ஒரு சப்-இன்ஸ்பெக்டர் இடமாற்றம் செய்யப்பட்டார்” என்றும் குறிப்பிடப்பட்டிருந்தது. 

இதன் மூலம், சின்ன சேலத்தில் கடந்த 2019-ல் புகார் கொடுக்க வந்த லாரி ஓட்டுநர் ஒருவரை சப்-இன்ஸ்பெக்டர் அறைந்த போது எடுக்கப்பட்ட பழைய வீடியோ இது. இந்த சம்பவத்தை அடுத்து எஸ்ஐ சண்முகம் விழுப்புரம் ஆயுதப்படை ரிசர்வ் பிரிவுக்கு பணிமாற்றம் செய்யப்பட்டார் என்பது உறுதியாகிறது.

இந்நிலையில் பழைய வீடியோவை பலரும் தற்போது தவறாகப் பரப்பி வருகின்றனர் 

முடிவு:

நம் தேடலில், புகார் கொடுக்க வந்தவரை கொடூரமாக தாக்கிய காவல்துறை அதிகாரி என்று கூறி பரவி வரும் வீடியோ கடந்த 2019-ல் எடுக்கப்பட்ட பழைய வீடியோ என்பதை அறிய முடிகிறது.