நூடுல்ஸில் மெழுகு சேர்க்கப்படுவதாக பரவும் ’வெங்கடேஷ் பட்’ வீடியோ!

நூடுல்ஸ் சாப்பிட கூடாது ஏன் சொல்றாங்க தெரியுமா..?

X Link

நூடுல்ஸில் ’மெழுகு' (Wax) சேர்க்கப்படுவதாகவும், அந்த மெழுகு குடலைவிட்டு வெளியேற மூன்று மாதங்கள் ஆகும் என்றும் பிரபல சமையல் நிபுணர் வெங்கடேஷ் பட் ‘பிகைண்ட்வுட்ஸ் ஏர் சேனலுக்காக’ அளித்த பேட்டியின் துணுக்கு ஒன்று சமூக வலைதளங்களில் பரவி வருகிறது. அதை பலரும் பகிர்ந்து வருகின்றனர். 

உண்மை என்ன?

இவ்வாறு தகவல் பரவுவது இது முதல்முறையல்ல. நூடுல்ஸில் மெழுகு சேர்க்கப்படுவது உண்மை தானா? என்ற கேள்வியுடன் இணையத்தில் தேடினோம்.

‘USA Today’ வெளிட்டுள்ள செய்தியின்படி, 2016ஆம் ஆண்டே இதுபோன்ற ஒரு தகவல் பேஸ்புக் தளத்தில் பரவியுள்ளதை குறிப்பிடுகிறது. 

மேலும், நூடுல்ஸில் மெழுகு சேர்க்கப்படுகிறது என்ற கூற்றை பொய்யென ’சிங்கப்பூர் உணவு நிறுவனம்’ மறுத்துள்ளது. இது சிங்கப்பூர் அரசின் அதிகாரப்பூர்வ நிறுவனமாகும். 

மேகி (Maggi) நிறுவனம் அதன் நூடுல்ஸ் தயாரிக்கப்படுவதற்கு சேர்க்கப்படும் மூலப்பொருட்கள் பற்றி அதன் இணையதளத்தில் குறிப்பிட்டுள்ளதில், ’மெழுகு’ பற்றி எங்கேயும் குறிப்பிடவில்லை. மேலும், மற்றொரு இடத்தில், மேகியில் மெழுகு சேர்க்கப்பட்டுள்ளதா என்ற கேள்விக்காக விடையாக, ‘உணவுப் பொருளில் என்னென்ன பொருட்கள் பயன்படுத்த வேண்டும் என்பதைப் பற்றி மிகக் கடுமையான விதிகள் உள்ளன.  மேலும் உணவுச் சங்கிலியில் எந்த மூலப்பொருளையும் அனுமதிக்கும் முன் அதிகாரிகள் மிகக் கடுமையான சோதனைகளை மேற்கொள்கின்றனர்.’ இதனையும் மீறி மெழுகு போன்ற பொருட்களை சேர்க்கமுடியாது என்பதை தெளிவுபடுத்தியுள்ளது. Maruchan Ramen Noodles நிறுவனமும் ’தனது நூடுல்ஸில் மெழுகு சேர்க்கப்படுவதில்லை’ என்று இதுபோன்ற விளக்கக் குறிப்பை எழுதியுள்ளது.

மேலும் ‘USA Today’ செய்தியின்படி நூடுல்ஸில் மெழுகு இருப்பதாக பதிவிடப்பட்ட பேஸ்புக் பதிவில் கூட, ‘இந்த மெழுகு குடலைவிட்டு வெளியேற இரண்டு நாட்களாகும்’ என்றுதான் கூறப்பட்டிருக்கிறது. ஆனால், வெங்கடேஷ் பட் மூன்று மாதங்கள் என்று சொல்கிறார்.

இதிலிருந்து நூடுல்ஸில் மெழுகு சேர்க்கப்படுவதாக சொல்லப்படுவது ஆதாரமற்ற வதந்தி என்பது தெளிவாகிறது.

முடிவு: 

நூடுல்ஸில் மெழுகு சேர்க்கப்படுவதாகவும், அது குடலைவிட்டு வெளியேற மூன்று மாதங்கள் என்றும் வெங்கடேஷ் பட் சொல்வது தவறான தகவலாகும்.