யூடர்ன் தீர்ப்பு
YouTurn Verdict
சரிபார்க்கப்பட்ட கூற்று
அமெரிக்க அரசியலுடன் தொடர்புடைய ராபர்ட் கென்னடியின் மற்றொரு பெயரான ‘Bobby… Bobby…’ எனக் கோஷமிட்டதை ’மோடி, மோடி’ எனத் திரித்துப் பரப்புகின்றனர்.
பரவிய செய்தி
விரிவான விளக்கம்
அமெரிக்க அதிபர் தேர்தலில் டொனால்ட் டிரம்ப் வெற்றி பெற்ற பிறகு பேசுகையில் அங்கிருந்த மக்கள் ’மோடி… மோடி…’ எனக் கோஷமிட்டதாக வீடியோ ஒன்று மோடி ஆதரவாளர்களால் சமூக வலைத்தளங்களில் பரப்பப்படுகிறது.
’அமெரிக்காவை மீண்டும் ஆரோக்கியமாக்க அவர் உதவுவார்’ எனச் சொன்னதும் அங்கிருந்த மக்கள் ’மோடி மோடி’ எனக் கோஷமிட்டதாகக் கூறப்படுகிறது.
உண்மை என்ன?
தேர்தலில் வெற்றி பெற்ற பிறகு டிரம்ப் பேசிய முழுமையான வீடியோ ’Fox News’ என்ற ஊடகத்தின் யூடியூப் பக்கத்தில் உள்ளது. அதில் பரவக் கூடிய பகுதி 19வது நிமிடம் 45வது வினாடியில் இடம் பெற்றுள்ளது.
டிரம்ப் பேசுகையில் ‘Robert F Kennedy Junior’ என்பவரின் பெயரைக் குறிப்பிட்டு ‘அவர் அமெரிக்காவை மீண்டும் ஆரோக்கியமாக மாற்ற உதவுவார்’ எனச் சொல்கிறார். அப்போது அங்கிருந்தவர்கள் ராபர்ட் கென்னடியின் மற்றொரு பெயரான ‘Bobby… Bobby…’ எனக் கோஷமிட்டுள்ளனர். இதற்குப் பிறகு டிரம்ப் பேசுகையில் பாபி என்ற பெயரைக் குறிப்பிட்டுப் பேசுகிறார்.
ராபர்ட் குறித்து டிரம்ப் பேசிய பகுதி ‘FOX 9 Minneapolis-St. Paul’ என்ற யூடியூப் பக்கத்திலும் பதிவிடப்பட்டுள்ளது. அதன் தலைப்பிலேயே, ‘Trump says Robert Kennedy Jr. will make America healthy again' என்றுதான் குறிப்பிடப்பட்டுள்ளது. அமெரிக்க முன்னாள் அட்டர்னி ஜெனரலாக இருந்த ராபர்ட் எஃப். கென்னடியின் மகன் இந்த ராபர்ட் எஃப் கென்னடி ஜூனியர். இவரைப் பற்றி டிரம்ப் பேசியதின் சிறு பகுதியை மட்டும் மோடியுடன் தொடர்புப்படுத்திப் பரப்புகின்றனர்.
டிரம்ப் பேசும் போது அமெரிக்க அரசியலுடன் தொடர்புடைய ராபர்ட் கென்னடியின் மற்றொரு பெயரான ‘Bobby… Bobby…’ எனக் கோஷமிட்டதை ’மோடி, மோடி’ எனத் திரித்துப் பரப்புகின்றனர்.
முடிவு:
டிரம்ப் பேசும் போது அங்கிருந்தவர்கள் ’மோடி… மோடி’ என கோஷம் எழுப்பவில்லை. ராபர்ட் எஃப் கென்னடி ஜூனியர் என்பவரைக் குறிப்பிடும் வகையில் ‘Bobby… Bobby…’ என்றுதான் கோஷம் எழுப்பியுள்ளனர்.
