திமுகவினர் ஆம்புலன்ஸில் நடனமாடியதாக பரப்பப்படும் வீடியோ! உண்மை என்ன?

‘கரூர் சம்பவம் நடைபெற்ற தினத்தில் திமுகவினர் சிலர் ஆம்புலன்ஸ்-குள் நடனமாடுகிறார்கள்!

X Link | Archive Link 

சமீபத்தில் கட்சிகளின் பிரச்சார கூட்டங்கள் நடக்கும் போது, அதனை இடையூறு செய்வதற்காக வேண்டுமென்றே ஆம்புலன்ஸ் விடப்படுவதாக அதிமுக பொதுச் செயலாளர் எடப்பாடி பழனிசாமி உட்பட சிலர் குற்றச்சாட்டுகளை முன்வைத்து வருகிறார்கள். தவெக கட்சியினரும் இந்த குற்றச்சாட்டுகளை முன்வைத்து வருகிறார்கள். கரூர் கூட்ட நெரிசல் சம்பவம் நடந்த போது கூட, தவெகவினர் ஆம்புலன்ஸை வழி மறித்து அதன் ஓட்டுநரை தாக்கியதாக செய்திகள் வெளியாகியுள்ளன.

இந்நிலையில், ஆம்புலன்ஸ் போன்ற வாகனத்திற்குள் சிலர் நடனமாடிக் கொண்டிருக்கும் வீடியோவைப் பதிவிட்டு, ‘கரூர் சம்பவம் நடைபெற்ற தினத்தில் திமுகவினர் சிலர் ஆம்புலன்ஸ்-குள் நடனமாடிக் கொண்டிருந்ததாகவும்’, இவ்வாறு திமுக ஆம்புலன்ஸை வைத்து நாடகமாடுவதாகவும் சமூக வலைதளத்தில் பரப்பப்படுகிறது.

Youtube Link:

உண்மை என்ன?

பரப்பப்படும் வீடியோவின் Keyframe-களைக் கொண்டு இணையத்தில் தேடுகையில், ‘பாலிமர் செய்திகள்’ யூடியூப் தளத்தில் இந்த வீடியோவைக் காணமுடிந்தது.

கடந்த செப்டம்பர் 21ஆம் தேதியன்று வெளியிடப்பட்டுள்ள அந்த செய்தியின் படி, அது ஆம்புலன்ஸ் இல்லை, நடமாடும் மருத்துவமனை வாகனம் என்பதும், அதில் நடனமாடியவர்கள் அதில் வேலை பார்க்கும் ஊழியர்கள் என்பதும் தெரிய வருகிறது.

இதே செய்தியை ‘தந்தி டிவி’-யும் வெளியிட்டுள்ளது. அதில் ‘திருநெல்வேலி வள்ளியூரிலிருந்து நாங்குநேரி செல்லும் வழியில் அரசு நடமாடும் மருத்துவ வாகனத்தில் ஊழியர்கள் நடனம் ஆடியதாக’ குறிப்பிடப்படுள்ளது.

மேற்குறிப்பிட்ட விவரங்களிலிருந்து, இந்த வீடியோவில் இருப்பது ஆம்புலன்ஸ் அல்ல, நடமாடும் மருத்துவ வாகனம் என்பதும், அதில் நடனமாடியவர்கள் திமுகவினர் அல்ல அந்த மருத்துவ வாகனத்தில் வேலை செய்யும் ஊழியர்கள் என்பதும் தெரியவருகிறது. மேலும் இது ஒரு வாரத்திற்கு முன்பே நடந்த செய்தி என்பதும் குறிப்பிடத்தக்கது.

முடிவு:

மருத்துவ வாகனத்தில் ஊழியர்கள் நடனமாடிய ஒரு வாரம் பழைய செய்தி வீடியோவை, கரூர் கூட்ட நெரிசல் சம்பவம் நடந்த நாளில் திமுகவினர் ஆம்புலன்ஸில் நடனமாடியதாக தவறாக பரப்புகிறார்கள்.