கிட்சனில் கேஸ் எரியும் போது பூச்சி மருந்து ஸ்ப்ரேக்களை பயன்படுத்த வேண்டாம் !

கேஸ் அடுப்பில் சமைக்கும் போது சிங்கு அருகே சுற்றித் திரிந்த கரப்பான் பூச்சிகளைக் கொல்ல ஸ்ப்ரே மூலம் பூச்சி மருந்தை பயன்படுத்தியதால் தீ விபத்து ஏற்பட்டு கணவன் மனைவி இருவருக்கும் தீக்காயம் ஏற்பட்டதாக ஓர் உதாரணத்துடன் சமையல் அறையில் நெருப்பு இருக்கும் போது பூச்சிகளை கொல்லும் ஸ்ப்ரேக்களை பயன்படுத்த வேண்டாம் என மக்களுக்கு எச்சரிக்கும் தகவல் ஒன்று பகிரப்பட்டு வருகிறது.

வைரல் செய்யப்படும் பதிவில் உதாரணத்திற்கு கூறப்பட்ட கதை கடந்த 9 ஆண்டுகளுக்கு முன்பிருந்தே பகிரப்பட்டு வருகிறது. எனினும், அது தொடர்பான தகவல்கள் கிடைக்கவில்லை.



ஆனால், " காசியாபாத் நகரில் உள்ள அபார்ட்மென்ட் வீட்டின் சமையல் அறையில் எரியக்கூடிய பூச்சிக் கொல்லி ஸ்ப்ரே தீ பிடித்ததால் 27 வயதான மனைவிக்கு 40% தீக்காயம் ஏற்பட்டதாகவும், கணவனும் சிறிய தீக்காயத்தால் பாதிக்கப்பட்டதாக " 2018-ல் வெளியான டைம்ஸ் ஆப் இந்தியா செய்தியில் கூறப்பட்டுள்ளது.

பல கம்ப்ரெஸ் செய்யப்பட்ட கேஸ் தயாரிப்புகள் போலவே வீட்டில் இருக்கும் பூச்சிகளை கொல்லும் ஸ்ப்ரேக்களும் பொதுவாக நெருப்பு, தீப்பொறிகள் போன்றவற்றில் இருந்து விலகி இருக்க எச்சரிக்கை செய்யும் எச்சரிக்கை குறியீடுகளுடன் வருகின்றன. அவற்றை குளிர்ந்த அல்லது உலர் பகுதியில் வைக்க வேண்டும் மற்றும் காலியான பிறகு தீயில் போடுவது தவிர்க்க வேண்டும் போன்ற எச்சரிக்கையும் உள்ளன.





பொதுவான விதி என்னவென்றால், நீங்கள் பயன்படுத்துவதற்காக இரசாயன தயாரிப்புகளை(ஸ்ப்ரே டைப்) வாங்கும் போது அதன் விளக்கத்தில் குறிப்பிடப்பட்டுள்ள பாதுகாப்பு வழிகாட்டுதல்களை படித்து பின்பற்ற வேண்டும். அலட்சியமாக இருத்தல் கூடாது.

முடிவு :

நம் தேடலில், சமையல் அறையில் கேஸ் உள்ளிட்ட நெருப்பு பயன்பாட்டில் இருக்கும் போது பூச்சிக் கொல்லி மருந்து ஸ்ப்ரே அடிப்பது தீ பிடிக்கும் வகையில் ஆபத்தானது என பகிரப்படும் தகவல் உண்மையே. எனினும், உதாரணமாக சொல்லப்பட்டு இருக்கும் சம்பவம் எங்கு நிகழ்ந்தது எனத் தெரியவில்லை. இருப்பினும், அதுபோன்ற தீ விபத்து சம்பவங்கள் நிகழ்ந்து இருக்கின்றன.

சமையல் அறையில் பூச்சிக் கொல்லி ஸ்ப்ரேக்களை கவனமாக கையாள வேண்டும். அதுமட்டுமின்றி, கேஸை வெளியேற்றும் ஸ்ப்ரேக்களின் எச்சரிக்கை தகவல் மற்றும் குறியீடுகளை அறிந்து பயன்படுத்தவும்.