'வங்கதேசத்தில் எரித்துக் கொல்லப்பட்ட தீபு சந்திர தாஸ்ஸின் கடைசி வீடியோ' எனப் பரவும் தவறான வீடியோ!

வங்கதேசத்தில் தீபு சந்திர தாஸ் என்ற இந்து இளைஞர் தாக்கப்பட்டு எரித்து கொல்லப்பட்டார். அவரின் கடைசி வீடியோ தான் இது. 

Facebook Link | Archive Link

வங்கதேசத்தில் தீபு சந்திர தாஸ் என்ற இந்து இளைஞர் கடந்த மாதம் (டிசம்பர் 2025) தாக்கப்பட்டு எரித்து கொல்லப்பட்டார். இந்நிலையில் தற்போது வீடியோ ஒன்று “தீபு சந்திர தாஸ்ஸின் கடைசி வீடியோ. அவர் வங்கதேச காவல்துறையால் பிடிக்கப்பட்டு வன்முறையாளர்களிடம் ஒப்படைக்கப்பட்டார்” என்று கூறி சமூக ஊடகங்களில் வைரலாகப் பரப்பப்படுகிறது. 

#FFF

உண்மை என்ன? 

பரவி வரும் வீடியோவை கூகுள் ரிவர்ஸ் இமேஜ் செர்ச் மூலம் ஆய்வு செய்து பார்த்ததில், நவம்பர் மாதத்தில் இருந்தே ஊடகங்களில் பரவி வரும் வீடியோ செய்தியாக வெளியிடப்பட்டுள்ளது என்பதை அறிய முடிந்தது. 

பரவி வரும் வீடியோவில் இருக்கும் நபர் குறித்து தேடியதில், தீபு சந்திர தாஸின் முகமும், இந்த வீடியோவில் காணப்படும் நபரின் முகமும் வேறுவேறாக இருந்ததை தெளிவாகக் காண முடிகிறது. 

“NPB News” ஊடகம் பரவி வரும் வீடியோவைக் குறிப்பிட்டு செய்தி வெளியிட்டிருந்தது. அதில் வீடியோவில் காணப்படும் இளைஞர், என்னுடைய பெயர் ‘அப்துல் மோமின்’ என்று கூறுவதை வீடியோவில் தெளிவாகக் கேட்க முடிகிறது. மேலும் இளைஞர் அணிந்திருந்த டீ-சர்ட்டிலும் மோமின் என்ற பெயரும்,  டாக்கா கல்லூரியின் லோகோவும் இடம்பெற்றுள்ளது. 

மேலும் டாக்கா காவல்துறையின் துணை காவல் ஆணையர் (DC) மசூத் ஆலம், பரவி வரும் வீடியோவில் காணப்படும் இளைஞரை பத்திரமாக ரிக்ஷாவில் அனுப்பி வைத்தது குறித்தும் ஊடகங்களில் செய்தி வெளியிடப்பட்டுள்ளது. 

முடிவு: 

நம் தேடலில், டாக்கா கல்லூரி மாணவரின் பழைய வீடியோவை, வங்கதேசத்தில் எரித்துக் கொல்லப்பட்ட தீபு சந்திர தாஸ்ஸின் கடைசி வீடியோ என்று கூறி தவறாகப் பரப்பி வருகின்றனர் என்பது உறுதியாகிறது.