'உச்சநீதிமன்றத்தில் பதவிபிரமாணத்தின் போது தமிழில் ஏற்புரை தந்த நீதிபதி மகாதேவன்' எனப் பரவும் தவறான வீடியோ!

உச்ச நீதிமன்றத்தில்! பதவியேற்பு நிகழ்வில் தமிழில் ஏற்புரை தந்த தமிழ் மீதும் மொழி மீதும் பற்று கொண்ட தமிழறிஞர், மாண்புமிகு உச்ச நீதிமன்ற நீதிபதி மகாதேவன் அவர்களுடைய பணி சிறக்க வாழ்த்துகள்..

X Link | Archive Link

உச்சநீதிமன்றத்தில் காலியாக இருந்த இரண்டு பதவிகளுக்கு, சென்னை உயர்நீதிமன்ற பொறுப்பு தலைமை நீதிபதியாக இருந்த ஆர்.மகாதேவன் மற்றும் ஜம்மு - காஷ்மீர் உயர்நீதிமன்ற தலைமை நீதிபதி என். கோடீஸ்வர் சிங் ஆகியோரின் பெயரை 'நீதிபதிகள் தேர்வுகுழு' எனப்படும் கொலீஜியம் (Collegium) பரிந்துரைத்திருந்தது. இந்தப் பரிந்துரையை குடியரசுத் தலைவர் திரெளபதி முர்மு ஒப்புதல் அளித்த நிலையில், இருவரும் புதிய உச்சநீதிமன்ற நீதிபதிகளாக சமீபத்தில் பதவியேற்றுக் கொண்டனர்.

இந்நிலையில் உச்சநீதிமன்றத்தில் தனது பதவியேற்பின்போது தமிழில் ஏற்புரை தந்த நீதிபதி மகாதேவன் என்றுகூறி 2:20 நிமிடங்கள் கொண்ட வீடியோ ஒன்று சமூக ஊடகங்களில் வைரலாகப் பரவி வருகிறது. அதில் அவர் தமிழ் புலவர்கள் பலரின் பாடல்களை குறிப்பிட்டு பேசுவதைக் காணமுடிகிறது. 

*உச்ச நீதிமன்றத்தில் !*

*பதவியேற்பு நிகழ்வில் தமிழில் ஏற்புரை தந்த*

*தமிழ் மீதும்*
*மொழி மீதும்*
*பற்று கொண்ட தமிழறிஞர்,*
*மாண்புமிகு உச்ச நீதிமன்ற நீதிபதி மகாதேவன் அவர்களுடைய*
*பணி சிறக்க வாழ்த்துக்கள் 💐💐💐* pic.twitter.com/H3YQRZZ8NS

— அஸ்வத்தாமன் சேரன் (@Aswathamaa_Ofcl) July 19, 2024

🙏

உச்ச நீதிமன்றத்தில் !

பதவியேற்பு நிகழ்வில்
தமிழில் ஏற்புரை தந்த

தமிழ் மீதும்
மொழி மீதும்
பற்று கொண்ட தமிழறிஞர்,
மாண்புமிகு உச்ச நீதிமன்ற நீதிபதி மகாதேவன் அவர்களுடைய
பணி சிறக்க வாழ்த்துக்கள் 💐💐💐 pic.twitter.com/XzulWguAnm

— Prof.P.Chandrasekaran. (@PChandran49) July 18, 2024

உண்மை என்ன?

பரவி வரும் செய்திகளின் உண்மைத்தன்மையை அறிய, உச்சநீதிமன்ற தலைமை நீதிபதி டி.ஒய்.சந்திரசூட் முன்னிலையில் சென்னை உயர்நீதிமன்ற பொறுப்பு தலைமை நீதிபதியாக இருந்த ஆர்.மகாதேவன் உச்சநீதிமன்ற நீதிபதியாக, பதவிப்பிரமாணம் செய்துகொண்ட வீடியோவை ஆய்வுசெய்து பார்த்தோம். 

"Sun News" ஊடகம் தனது யூடியூப் பக்கத்தில், "BREAKING: உச்ச நீதிமன்ற நீதிபதியாக ஆர்.மகாதேவன் பதவியேற்பு | Justice R. Mahadevan in Supreme Court" என்ற தலைப்பில் இது குறித்த வீடியோவை கடந்த 17ஆம் தேதி வெளியிட்டிருந்தது. அதில், நீதிபதி ஆர்.மகாதேவன் ஆங்கிலத்திலேயே உச்சநீதிமன்ற நீதிபதியாக பதவிப்பிரமாணம் செய்து கொள்கிறார். 

மேலும் பரவி வரும் வீடியோவில் உள்ள காட்சிகள், நீதிபதி ஆர்.மகாதேவன் உச்சநீதிமன்ற நீதிபதியாக பதவிப்பிரமாணம் செய்து கொண்ட வீடியோவின் காட்சிகளோடு வேறுபட்டு இருந்தன. எனவே பரவி வரும் வீடியோவை கூகுள் ரிவர்ஸ் இமேஜ் செர்ச் மூலம் ஆய்வுசெய்து பார்த்தோம். 

"News7 Tamil PRIME"  யூடியூப் பக்கத்தில் "புதிய உச்ச நீதிமன்ற நீதிபதியாக பொறுப்பேற்கும் நீதிபதி மகாதேவனுக்கு பிரிவு உபச்சார விழா" என்று குறிப்பிட்டு பரவி வரும் வீடியோவின் முழுப்பகுதி கடந்த 16ஆம் தேதி பதிவு செய்யப்பட்டிருந்தது. அதில் சரியாக 9:00 வது நிமிடத்தில் பரவி வரும் வீடியோ கச்சிதமாகப் பொருந்தியது. 

இதன்மூலம், நீதிபதி மகாதேவனுக்கு சென்னையில் பிரிவு உபச்சார விழா நடத்தியபோது எடுக்கப்பட்ட வீடியோவை, உச்சநீதிமன்ற நீதிபதியாக ஆர்.மகாதேவன் பதவியேற்றபோது எடுக்கப்பட்ட வீடியோ என்று கூறி சிலர் தவறாகப் பரப்பி வருகின்றனர் என்பதை அறியமுடிகிறது.

மேலும் சென்னையில் நடைபெற்ற பிரிவு உபச்சார விழாவின் போதே நீதிபதி ஆர். ஆர்.மகாதேவன் தமிழில் பேசியுள்ளார். புதிய உச்ச நீதிமன்ற நீதிபதியாக அவர் பதவிபிரமாணம் செய்து கொண்ட போது, உச்சநீதிமன்ற தலைமை நீதிபதி டி.ஒய்.சந்திரசூட் முன்னிலையில் அவர் ஆங்கிலத்திலேயே பேசுகிறார் என்பதையும் தெளிவாகக் காணமுடிகிறது.

முடிவு:

நம் தேடலில், உச்சநீதிமன்றத்தில் பதவிப் பிரமாணத்தின்போது தமிழில் ஏற்புரை தந்த நீதிபதி மகாதேவன் என்று கூறி பரவி வரும் செய்திகள் தவறானவை என்பதை அறியமுடிகிறது.