முன்பின் தெரியாதவர் தொலைத்த ஆவணத்தைத் தபால் பெட்டியில் போட்டால் என்னவாகும்?

டிரைவிங் லைசென்ஸ் (DL), ரேஷன் கார்டு, பாஸ்போர்ட், வங்கி பாஸ்புக், வாக்காளர் அட்டை போன்ற முக்கியமான ஆவணங்களை யாராவது தவறவிட்டதாக நீங்கள் கண்டால், அவற்றை தபால் பெட்டிகளில் போட்டு விடவும். அவை உரிமையாளரிடம் ஒப்படைக்கப்படும் மற்றும் அவர்களிடமிருந்து அஞ்சல் கட்டணம் அல்லது அபராதம் வசூலிக்கப்படும்".

முன்பின் தெரியாதவர் தொலைத்த ஓட்டுநர் உரிமம் (driving licence), குடும்ப அட்டை (ration card), கடவுச் சீட்டு (passport), வங்கிக் கணக்கு புத்தகம் (bank passbook), வாக்காளர் அடையாள அட்டை (voter id) போன்ற ஆவணங்கள் உங்களிடம் கிடைக்கும் பட்சத்தில், அதனைத் தபால் பெட்டியில் போட்டுவிட்டால், அதில் உள்ள முகவரிக்குச் சென்று சேர்ந்துவிடுமென ஒரு தகவல் வாட்ஸ் அப்பில் பகிரப்படுகிறது. மேலும் அதில், இதற்கான அஞ்சல் கட்டணம் அல்லது அபராதம் ஆவண உரிமையாளரிடம் வசூலிக்கப்படும் என்றும் அப்பதிவில் குறிப்பிடப்பட்டுள்ளது.

இந்த தகவலை யூடர்னின் வாட்சப் எண்ணிற்கு (+91 63697 48351) அனுப்பி இதன் உண்மைத் தன்மையைச் சரிபார்க்க வாசகர் ஒருவர் கேட்டுள்ளார்.

உண்மை என்ன?

பரவக் கூடிய வாட்ஸ் அப் செய்தி குறித்து இணையத்தில் தேடியதில், இத்தகவல் பல ஆண்டுகளாக இணையத்திலும் சமூக வலைத்தளத்தில் இருப்பதைக் காண முடிந்தது. மேலும் ஹைதராபாத் போக்குவரத்து காவல்துறையும் இதே தகவலை 2013-ம் ஆண்டு தனது பேஸ்புக் பக்கத்தில் பதிவிட்டுள்ளது.

எனவே இது பற்றி முழுமையாக அறிய, சென்னை பூக்கடை பகுதியில் அமைந்துள்ள அஞ்சல் அலுவலகத்தை (Chennai City North Division) தொடர்பு கொண்டு பேசினோம். 

இந்த தகவல் உண்மைதான். முன்பின் தெரியாதவர் ஆவணத்தைத் தொலைத்த நிலையில், அது உங்களிடம் கிடைத்தால் அருகில் உள்ள தபால் பெட்டியில் போட்டுவிடுங்கள். உரியவரிடம் ஆவணத்தில் உள்ள முகவரி அடிப்படையில் கொண்டு சேர்க்கப்படும். ஆனால், இதற்கு எவ்வித அபராதமோ கட்டணமோ வசூலிக்கப்படாது என அஞ்சல் அலுவலகம் தரப்பில் தெரிவிக்கப்பட்டது. 

இவற்றிலிருந்து மேற்கண்ட வாட்ஸ் அப் தகவல் உண்மைதான் என்பதை உறுதி செய்ய முடிகிறது. 

முடிவு: 

முன்பின் தெரியாதவர் தொலைத்த ஆவணம் உங்களிடம் கிடைத்தால், அருகில் உள்ள தபால் பெட்டியில் போட்டுவிடுங்கள். அது ஆவணத்தில் உள்ள முகவரிக்குச் சென்று சேர்ந்துவிடும் எனப் பகிரப்படும் தகவல் உண்மைதான்.