இஸ்லாமியப் பெண்களுக்கு விவாகரத்து உரிமையை மோடி ஆட்சிதான் கொடுத்ததா? உண்மை என்ன?

முத்தாலாக் தடை சட்டம் வரும் முன்பு கணவர் தான் மனைவியை "தலாக் தலாக் தலாக்" என சொல்லி விவாகரத்து செய்யும் நடைமுறை அதிகம்  இருந்தது. இஸ்லாமிய பெண்களுக்கும் விவாகரத்து செய்யலாம் என்ற இந்த சம உரிமையை தந்தது தான் மோடியின் சமத்துவ ஆட்சி

X link

இசையமைப்பாளர் ஏ.ஆர்.ரகுமான் மற்றும் அவரது மனைவி சாய்ரா பானு தங்களது திருமண உறவை முறித்துக் கொள்வதாக அறிவித்தனர். 

இதனைத் தொடர்ந்து பாஜகவைச் சேர்ந்த ‘சங்கி பிரின்ஸ்’ என்ற எக்ஸ் பக்கத்தில்  ‘இஸ்லாமிய பெண்களுக்கும் விவாகரத்து செய்யலாம் என்ற இந்த சம உரிமையை தந்தது தான் மோடியின் சமத்துவ ஆட்சி’ எனப் பதிவிட்டுள்ளார்.  

உண்மை என்ன?

இஸ்லாம் மத சட்டத்தின்படி கணவன் தன் மனைவியை விவாகரத்து செய்ய ’தலாக்’ என்னும் முறை பின்பற்றப்பட்டு வந்தது. குறிப்பிட்ட கால இடைவெளியில் மூன்று முறை கணவன் மற்றும் மனைவிக்கு இடையில் நடைபெறும் பேச்சுவார்த்தையில் உடன்பாடு ஏற்படாத பட்சத்தில் இருவரும் நிரந்தரமாகப் பிரிந்துவிடுவர். இத்தகைய முத்தலாக் முறை இந்தியாவில் தடை செய்யப்பட்டுவிட்டது.

இதேபோல் மனைவி தன் கணவனை விவாகரத்து செய்ய இஸ்லாத்தில் ‘குலா’ என்ற முறை பின்பற்றப்படுகிறது. இந்த முறை பல நூறு ஆண்டுகளாக இஸ்லாம் சட்டத்தில் உள்ள ஒரு நடைமுறையாகும். விவாகரத்து செய்யும் போது திருமணத்திற்காகக் கணவனிடம் இருந்து மனைவி பெற்ற மகரை திருப்பி அளிக்க வேண்டும். விவாகரத்தைப் போலவே மறுமண உரிமையும் இஸ்லாம் சட்டத்தில் பெண்களுக்கு உள்ளது.

இதனைத் தவிர்த்து ‘THE DISSOLUTION OF MUSLIM MARRIAGES ACT-1939’ மூலம் நீதிமன்ற வாயிலாகவும் இஸ்லாமியப் பெண்கள் விவாகரத்து பெரும் உரிமை பல ஆண்டுகளாக உள்ளது.

இவற்றில் இருந்து இஸ்லாம் முறைப்படியும் நீதிமன்றம் வாயிலாகவும் இஸ்லாமியப் பெண்களுக்குப் பல ஆண்டுகளாக விவாகரத்து உரிமை வழங்கப்பட்டு வருவதை அறிய முடிகிறது. ஆனால், மோடி ஆட்சியில் தான் இந்த உரிமை வழங்கப்பட்டதாகப் பொய் செய்தி பரப்பப்படுகிறது.  

முடிவு:

இஸ்லாமியப் பெண்களுக்கும் விவாகரத்து செய்யும் உரிமையை மோடி பெற்றுத்தந்ததாகப் பரவும் தகவல் தவறானது. இஸ்லாமிய சட்டத்தின் படியும் நீதிமன்றத்தின் வாயிலாகவும் இஸ்லாமியப் பெண்கள் விவாகரத்து பெறும் உரிமை நீண்டகாலமாக நடைமுறையில் உள்ளது.