ராமர் கோயில் திறப்பை முன்னிட்டு கும்பகோணத்தில் கூடிய பக்தர்கள் எனத் தவறாகப் பரவும் பழைய வீடியோ !

தமிழக மக்கள் ஒருங்கிணைந்து இது ஆன்மீக மண் என்று நிரூபித்த தருணம்.. இடம் :  கும்பகோணம்.

X post link | Archive link 

ஜனவரி 22ம் தேதி(நேற்று) அயோத்தியில் ராமர் கோயில் திறப்பு விழா நடைபெற்று முடிந்தது. ராமர் கோயில் திறப்பை முன்னிட்டு தமிழக கோவில்களில் சிறப்பு பூஜை மற்றும் அன்னதானம் செய்ய இந்து சமய அறநிலையத்துறை தடை விதித்து உள்ளதாக தினமலர் பொய் செய்தியை வெளியிட நிதியமைச்சர் நிர்மலா சீதாராமன் உள்பட பாஜகவினர் அதை பரப்பவும் செய்தனர். ராமர் கோயில் திறப்பு நிகழ்ச்சியின் நேரடி ஒளிபரப்பை கோயில்களில் திரையிட தமிழ்நாட்டில் காவல்துறை அனுமதி மறுத்ததாக வழக்கும் தொடரப்பட்டது.

இதையடுத்து, தனியார் கோயில்கள், மண்டபங்களில் நிகழ்ச்சியை ஒளிபரப்ப அனுமதி தேவையில்லை, ஆனால் இந்து சமய அறநிலையத்துறை கீழ் கோயில்களில் ஒளிபரப்ப செயல் அலுவலரிடம் அனுமதி பெற வேண்டும் என சென்னை உயர்நீதிமன்ற நீதிபதி உத்தரவு பிறப்பித்து இருந்தார்.

விரிவாக படிக்க : ராமர் கோவில் திறப்பு விழாவை முன்னிட்டு வதந்திகள் மூலமாக அரசியல் செய்யும் தலைவர்கள் !

இந்நிலையில், அயோத்தி ராமர் கோயில் திறப்பை முன்னிட்டு தமிழ்நாட்டின் கும்பகோணத்தில் கூடிய பக்தர்கள் கூட்டம் எனக் கூறி 15 நொடிகள் கொண்ட வீடியோ சமூக வலைதளங்களில் வைரலாகப் பரவி வருகிறது.

"எவன் தடுத்தாலும் நான் சார்ந்த மதத்தின் கடமையை ஆற்றியே தீருவேன்"
...சாதித்த கும்பகோணம் மக்கள்#JaiShriRam pic.twitter.com/3CLwMd1D1X

— 2026CM_Annamalai (@SaffronSampath) January 23, 2024

அயோத்தியில் ஸ்ரீ ராமர் ஆலய கும்பாபிஷேகத்திற்கு தமிழகத்தில் இவ்வளவு எழுச்சி பெற பாரத பிரதமர் அவர்களின் மூன்று நாள் தமிழக வருகை ஆலய பிரவேசம் முக்கியமான காரணம் அதை மறுக்கவே முடியாது .இடம்.கும்பகோணம் @sgurumurthy @ProfessorBJP@KanchiMatham#RamMandirPranPrathistha#JaiShriRam pic.twitter.com/16UNkn6LFm

— Tamil vanan (@TamilvananDKV) January 23, 2024

உண்மை என்ன ? 

வைரல் செய்யப்படும் வீடியோவில் காண்பிக்கப்படும் தெப்பக்குளம் கும்பகோணத்தை சேர்ந்தது அல்ல. அந்த வீடியோவில் நம்ம ஆற்காடு எனும் வாட்டர் மார்க் இடம்பெற்று உள்ளது. அதை வைத்து தேடுகையில், நம்ம ஆற்காடு எனும் இன்ஸ்டாகிராம் பக்கத்தில் ஜனவரி 7ம் தேதியே இந்த வீடியோ பதிவாகி இருந்துள்ளது.



அதில், ரத்தினகிரி பாலமுருகன் திருக்கோவில் மக்கள் வெள்ளத்தில் தெப்பக்குளம் காட்சி எனக் குறிப்பிடப்பட்டுள்ளது. இக்கோயில் ராணிப்பேட்டை மாவட்டத்தில் அமைந்துள்ளது. மேற்கொண்டு தேடுகையில், கடந்த 2023ம் ஆண்டு பிப்ரவரி 13ம் தேதி யூடியூப் சேனலில் இதே வீடியோ வெளியாகி இருக்கிறது.



2023ம் ஆண்டு பிப்ரவரி மாதம் ரத்தினகிரி பாலமுருகன் திருக்கோயிலின் புதிய தெப்பகுளம் திறப்பை முன்னிட்டு ஆயிரக்கணக்கான பக்தர்கள் கலந்து கொண்ட போது எடுக்கப்பட்ட வீடியோவை கும்பகோணம் எனத் தவறாகப் பரப்பி வருகின்றனர்.

மேலும் படிக்க : எடப்பாடி பழனிச்சாமி அயோத்தி விழாவில் கலந்து கொண்டதாகப் பரவும் வதந்திகள் !

மேலும் படிக்க : காஷ்மீரின் லால் சவுக்கில் ராமர் படம் காட்சிப்படுத்தப்பட்டதாகப் பரவும் தவறான தகவல்!

முடிவு : 

நம் தேடலில், அயோத்தி ராமர் கோயில் திறப்பை முன்னிட்டு கும்பகோணத்தில் கூடிய பக்தர்களின் கூட்டம் எனப் பரவும் வீடியோ தவறானது. அந்த வீடியோ கடந்த ஆண்டு ரத்தினகிரி பாலமுருகன் திருக்கோயிலின் புதிய தெப்பகுளம் திறப்பின் போது எடுக்கப்பட்ட வீடியோ என்பதை அறிய முடிகிறது.