யூடர்ன் தீர்ப்பு
YouTurn Verdict
சரிபார்க்கப்பட்ட கூற்று
கடந்த 2024 ஆம் ஆண்டிலிருந்தே பரவி வரும் வீடியோ சமூக ஊடகங்களில் பதிவு செய்யப்பட்டுள்ளது.
பரவிய செய்தி
ஜப்பான் கடற்கரையில் 7.6 ரிக்டர் அதிர்ச்சி – சுனாமி எச்சரிக்கை வெளியானது!
விரிவான விளக்கம்
ஜப்பானின் ஹோன்ஷூ தீவின் வடக்குப் பகுதியில் பசிபிக் பெருங்கடலில் டிசம்பர் 08 அன்று 7.5 ரிக்டர் அளவிலான நிலநடுக்கம் ஏற்பட்டது. இந்த நிலநடுக்கமானது ரிக்டர் அளவில் 7.6 ஆகப் பதிவானதாக, அமெரிக்கப் புவியியல் ஆய்வு மையம் தெரிவித்துள்ளது. இந்த சக்திவாய்ந்த நிலநடுக்கத்தில் 33 பேர் படுகாயமடைந்தனர்.
இந்நிலையில் ஜப்பான் நிலநடுக்கம் ஏற்பட்ட காட்சிகள் என்று குறிப்பிட்டு 20 வினாடிகள் கொண்ட வீடியோ ஒன்று சமூக ஊடகங்களில் தற்போது வைரலாகப் பரவி வருகிறது. வீடியோவில் சாலைகளுடன் சேர்ந்து மின்கம்பங்களும் பயங்கரமாக அதிர்வதை வீடியோவில் தெளிவாகக் காண முடிகிறது.
உண்மை என்ன?
பரவி வரும் வீடியோவின் கீபிரேம்களை கூகுள் ரிவர்ஸ் இமேஜ் செர்ச் மூலம் தேடிப் பார்த்ததில், இது தற்போது எடுக்கப்பட்ட வீடியோ அல்ல என்பதை அறிய முடிந்தது.
கடந்த 2024 ஆம்ஆண்டு ஜூன் மாதம் பரவி வரும் இதே வீடியோ, “நிலநடுக்கம்“ என்று குறிப்பிட்டு “GTA VI“ என்ற ஃபேஸ்புக் பக்கத்தில் பதிவு செய்யப்பட்டுள்ளது.
இதே போன்று, “2024 ஆம் ஆண்டு ஜப்பானில் நிலநடுக்கம்” என்று குறிப்பிட்டு பரவி வரும் காட்சிகளைக் கொண்ட இதே வீடியோ “danielskenty“ என்ற இன்ஸ்டாகிராம் பக்கத்திலும் பதிவு செய்யப்பட்டுள்ளது.
இதன் மூலம் கடந்த 2024 ஆம் ஆண்டிலிருந்தே பரவி வரும் வீடியோ சமூக ஊடகங்களில் "ஜப்பானில் நிலநடுக்கம்" என்று குறிப்பிட்டு பதிவு செய்யப்பட்டுள்ளது என்பது உறுதியாகிறது. இந்நிலையில் பழைய வீடியோவை, ஜப்பானில் தற்போது நிலநடுக்கம் ஏற்பட்டபோது எடுக்கப்பட்ட காட்சிகள் என்று குறிப்பிட்டு பலரும் தவறாகப் பரப்பி வருகின்றனர்.
முடிவு:
நம் தேடலில் "ஜப்பானில் டிசம்பர் 08 அன்று 7.5 ரிக்டர் அளவில் ஏற்பட்ட நிலநடுக்கத்தின் காட்சி" என்று குறிப்பிட்டு பரவும் வீடியோ தற்போது எடுக்கப்பட்டதல்ல என்பது உறுதியாகிறது.
