யூடர்ன் தீர்ப்பு
YouTurn Verdict
சரிபார்க்கப்பட்ட கூற்று
உலகப் புகழ்பெற்ற மதுரை மீனாட்சிஅம்மன் கோயிலில் 210 கிலோ தங்கத்தால் செய்யப்பட்ட மீனாட்சி அம்மனின் விக்கிரகம் என்று கூறி புகைப்படம் மற்றும் வீடியோ ஒன்று சமூக ஊடகங்களில் வைரலாகப் பரவி வருகின்றது.
பரவிய செய்தி
தமிழகத்தில் உலகப் புகழ்பெற்ற மதுரை கோயிலில் 210 கிலோ தங்கத்தால் செய்யப்பட்ட ஸ்ரீ மீனாட்சி அம்மாவின் விக்கிரகம்.
விரிவான விளக்கம்
உலகப் புகழ்பெற்ற மதுரை மீனாட்சி அம்மன் கோயிலில் 210 கிலோ தங்கத்தால் செய்யப்பட்ட மீனாட்சி அம்மனின் விக்கிரகம் என்று கூறி புகைப்படம் மற்றும் வீடியோ ஒன்று சமூக ஊடகங்களில் வைரலாகப் பரவி வருகின்றது.
உண்மை என்ன?
பரவி வரும் வீடியோவின் கீபிரேம்களை கூகுள் ரிவர்ஸ் இமேஜ் செர்ச் மூலம் ஆய்வு செய்ததில். பரவி வரும் வீடியோ கடந்த 2022ஆம் ஆண்டிலிருந்தே சமூக ஊடகங்களில் வைரலாகப் பரவி வந்துள்ளது என்பதை அறிய முடிந்தது.
‘Getty images’ இணையதளப்பக்கத்தில் பரவி வரும் இதே புகைப்படம், மதுரையில் உள்ள நகைக்கடை ஒன்றில் எடுக்கப்பட்டது என்று குறிப்பிட்டு பதிவிடப்பட்டிருந்ததையும் காணமுடிகிறது.
எனவே இதுகுறித்து தேடியதில், மதுரையில் உள்ள செம்மனூர் நகைக்கடையின் ஃபேஸ்புக் பக்கத்தில், “உங்களுக்கு மதுரை மீனாட்சி அம்மனின் அருள் கிடைக்கட்டும். மதுரை மீனாட்சி அம்மனின் சிலை, 210 கிலோ தங்கம் மற்றும் வெள்ளியைப் பயன்படுத்தி வடிவமைக்கப்பட்டு, மதுரை மீனாட்சி அம்மன் கோவிலில் ஆசிர்வதிக்கப்பட்ட இச்சிலை எங்கள் ஷோரூமில் வைக்கப்பட்டுள்ளது” என்று குறிப்பிட்டு கடந்த 2020ஆம் ஆண்டு மார்ச் 12 அன்று வீடியோ ஒன்று பதிவு செய்யபட்டிருந்தது.
இதே போன்று, செம்மனூர் நகைக்கடையின் ஃபேஸ்புக் பக்கத்தில் இதுகுறித்த புகைப்படங்கள் கடந்த 2020ஆம் ஆண்டு மார்ச் 13 அன்று பதிவு செய்யப்பட்டுள்ளதையும் காணமுடிகிறது.
எனவே மதுரையில் உள்ள செம்மனூர் நகைக்கடையின் நுழைவு வாயிலில், 210 கிலோ தங்கம் மற்றும் வெள்ளியைப் பயன்படுத்தி வடிவமைக்கப்பட்ட மீனாட்சி அம்மன் சிலையை, மதுரையில் உள்ள புகழ்பெற்ற மீனாட்சி அம்மன் கோயிலில் உள்ள சிலை என்று கூறி பலரும் தவறாகப் பரப்பி வருகின்றனர் என்பதை அறியமுடிகிறது.
முடிவு:
உலகப் புகழ்பெற்ற மதுரை மீனாட்சி அம்மன் கோயிலில் 210 கிலோ தங்கத்தால் செய்யப்பட்ட மீனாட்சி அம்மனின் விக்கிரகம் என்று கூறி பரவி வரும் வீடியோ தவறானது என்பதை அறியமுடிகிறது. இது மதுரையில் உள்ள செம்மனூர் நகைக்கடையின் நுழைவு வாயிலில், 210 கிலோ தங்கம் மற்றும் வெள்ளியைப் பயன்படுத்தி வடிவமைக்கப்பட்ட மீனாட்சி அம்மன் சிலை.
