28 நாட்கள் தொடர்ந்து எடுக்கப்பட்ட நிலவின் பிறை நிலைகள் என்று பரப்பப்படும் புகைப்படம்! உண்மை என்ன?

ஒரே இடத்தில் ஒரே நேரத்தில் 28 நாட்கள் தொடர்ந்து எடுக்கப்பட்ட வளர்பிறை நிலவின் அழகிய காட்சி

X Link | Archive Link

வானில் நிலவு வளர்ந்து தேயும் பிறைகளை காட்சிபடுத்தும் வகையில் எடுக்கப்பட்ட புகைப்படம் ஒன்றை பதிவிட்டு, இது 'ஒரே இடத்தில் ஒரே நேரத்தில் 28 நாட்கள் தொடர்ந்து எடுக்கப்பட்டது' என்று சமூக வலைதளங்களில்  பரப்பப்படுகிறது.

உண்மை என்ன:

இந்த புகைபடத்தின்  keyframe-களைக் கொண்டு தேடுகையில், Giorgia Hofer என்னும் வானியல் புகைப்படக் கலைஞரின் இன்ஸ்டாகிராம் பக்கத்தில் இந்த புகைப்படத்தை காண முடிந்தது. 2018ஆம் ஆண்டு ஜீன் 22ஆம் தேதி அன்று இந்த புகைப்படத்தை அவர் பதிவிட்டிருக்கிறார். அதில் இந்த புகைப்படம் எடுக்கப்பட்டதைப் பற்றிய குறிப்புகளையும் பதிவிட்டுள்ளார்.

அதன்படி, இந்தப் புகைப்படம் 28 புகைப்படங்களின் கலவையாகும் (Composition). இது இத்தாலியின் Cridola Group என்னும் மலைப்பகுதியில் 'சினோடிக் மாதம்' என்று அழைக்கப்படுகிற ஒரு சந்திர மாதத்தில் நிலவின் மாறக்கூடிய இடத்தையும் (Positions) நிலைகளையும் (phases) காட்சிபடுத்துவதற்காக மேற்கொள்ளப்பட்ட முயற்சியாகும்.

இந்த புகைப்படத்தை எடுக்க, வானவியல் செயலி ஒன்றை பயன்படுத்தி 27 நாட்களுக்கு நிலவின் இருப்பிடத்தை கணக்கிட்டு புகைப்படம் எடுத்துள்ளார். இந்த 27 நாட்களில் ஒவ்வொரு 1481 நிமிடங்களுக்கும் (24 மணிநேரம் 41 நிமிடங்கள்) நிலவின் மாறக்கூடிய இடங்களை கணக்கிட்டு அதன்படி புகைப்படங்களை எடுத்துள்ளார். 

ஆனால், வானிலை சரியாக அமையாத  காரணத்தால் இந்த புகைப்படங்களை எடுத்து முடிக்க அவருக்கு ஓராண்டு தேவைப்பட்டிருக்கிறது.

'இந்தப் புகைப்படத்தின் இடதுபுறத்தில் இருப்பவை நிலவின் தேய்பிறை ஆகும். அது 2017 ஜனவரி மாதம் எடுக்கப்பட்டிருக்கிறது.  அதேபோல் புகைப்படத்தின் வலதுபுறத்தில் இருப்பவை நிலவின் வளர்பிறை காலமாகும். அவை 2017 ஜீலை தொடங்கி டிசம்பர் 2017 வரை எடுக்கப்பட்டதாகும்'  என்று Giorgia Hofer தனது இன்ஸ்டாகிராம் பதிவில் எழுதியுள்ளார்.

இதிலிருந்து, இந்த புகைப்படம் ஓராண்டாக எடுக்கப்பட்ட 28 புகைப்படங்களின் கலவை என்பது தெளிவாகிறது.  இதன்படி பார்த்தால் அது உண்மையில் 28 நாட்களில் ஏற்பட்ட நிலவின் நிலைகளையும் இடத்தையும் காட்சிபடுத்தவில்லை. ஆனால், அப்படி 28 நாட்கள் நிலவு வளர்ந்து தேயும் பிறை நிலைகளை மறு உருவாக்கம் செய்யும் வகையில் ஓராண்டாக எடுக்கப்பட்டதாகும். இதனால், இந்த புகைப்படம் 28 நாட்களில் எடுக்கப்பட்டது என்று கூறுவது திரிக்கப்பட்ட தகவலாகும்.

முடிவு:

இந்த புகைப்படம் 28 புகைப்படங்களின் கலவையாகும் (Composition). அது 2017 ஜனவரி மாதம் தொடங்கி 2017 டிசம்பர் மாதம் வரையிலான ஓராண்டில் எடுக்கப்பட்டதாகும். அது 28 நாட்களில் எடுக்கப்பட்டதாக திரித்துப் பரப்பப்படுகிறது.